ახალციხის მერია ახალგაზრდების გენდერული განათლებით დაინტერესდა

დისკუსია ახალციხის დემოკრატიული ჩართულობის ცენტრში, ახალციხის მერიისა და ახალციხის ქალთა ოთახის მენეჯერის ორგანიზებით შედგა. შეხვედრას ქალთა ოთახის ხელმძღვანელი ნინო რუხაძე გაუძღვა.

მისი თქმით, შეხვედრის მოწყობის იდეა მერიას გაუჩნდა: „ რეგიონის მასშტაბით ეს პირველი შემთხვევაა, როდესაც მუნიციპალიტეტს ამ საკითხებზე ცნობიერების ასამაღლებელი შეხვედრის მოწყობის სურვილი გაუჩნდა“.

გენდერული თემატიკის ზოგადი მიმოხილვის შემდეგ დემოკრატიული ჩართულობის ცენტრში შეკრებილ ახალგაზრდებს აჩვენეს ფილმი „ხმა ამოიღეთ!“

„ხმა ამოიღეთ“ არის დოკუმენტური ფილმი ქალთა მიმართ ძალადობაზე. ფილმი რეალურ ამბებზე, რეალურ თავგადასავლებზე მოგვითხრობს.
"ხმა ამოიღეთ" გაეროს ერთობლივი პროგრამის "გენდერული თანასწორობის ხელშეწყობისთვის საქართველოში" ფარგლებშია გადაღებული.
„პრობლემური თემები განვიხილეთ, საინტერესო რჩვევები და ბევრი ინფორმაცია მივიღეთ“, – განაცხადა შეხვედრის დასრულების შემდეგ ახალციხის მეხუთე საჯარო სკოლის მოსწავლემ ანანო მოსეშვილმა.

შეხვედრა ახალციხის მერიის კულტურის სამსახურის ორგანიზებით შედგა. როგორც სამსახურის ხელმძღვანელმა, მარინა გოგოლაძემ აღნიშნა, მსგავს შეხვედრებს მერიის კულტურის სამსახური მომავალშიც გეგმავს: „დიდი სურვილი გვქონდა, რომ ეს შეხვედრა გამართულიყო. ძალიან საინტერესო გამოვიდა, მომავალში მეტი სიხშირით გავმართავთ“.

[ვარლამ წიკლაური, ახალციხე]