სოფელ კლდეში სახლი დაიწვა

ხანძარი ნ. კურტანიძის სახლში დაახლოებით 19:00 საათზე გაჩნდა. როგორც ადგილობრივები ამბობენ, დიასახლისი, რომელიც შინ მარტო იმყოფებოდა, სახლს მიდგმულ ფარდულში ცეცხლზე კომპოტებს ადუღებდა.

„ნაკვერჩხლიდან გაჩნდა ხანძარი სავარაუდოდ. შემდეგ ცეცხლის გამო გაზის ბალონი აფეთქდა და ამან ხანძარი უფრო გააძლიერა“, – გვიყვებიან თვითმხილველები.

მათი თქმით, სახანძო–სამაშველო სამსახური ადგილზე დროულად მივიდა, თუმცა იმის გამო, რომ ძლიერი ქარი იყო, ხანძრის ლოკალიზება დროულად ვერ მოხერხდა.

კლდეში გამგებლის წარმომადგენლის ვლადიმერ კურტანიძის თქმით, სახლი მთლიანად დაიწვა: „სამწუხაროდ ვერაფრის გადარჩენა ვერ მოხერხდა. ხანძრით დაზარალებულებს თვითმმართველობა ეხმარება ხოლმე და ამ ოჯახსაც დავეხმარებთ ალბათ“.

ამ დრომდე ადგილზე მეხანძრეები ცეცხლის ბოლომდე ჩაქრობას ცდილობენ. როგორც საგანგებო სიტუაციების მართვის დეპარტამენტში აცხადებენ, ცეცხლი ლოკალიზებულია.

ადგილზე მობილიზებული პოლიციაც. მოხმდარზე ძიება სისხლის სამართლის კოდექსის 187–ე მუხლით დაიწყო, რაც სხვისი ნივთის დაზიანებას ან განადგურებას გულისხმობს;


[თამუნა უჩიძე, ახალციხე]