„SPEAK UP“– ი საზეიმოდ დაიხურა

დღეს, 20 ოქტომბერს ახალციხის სახელმწიფო უნივერსიტეტის მეორე კორპუსის შენობაში პროექტ speak up– ის მონაწილეთა დაჯილდოვების ცერემონიალი ჩატარდა.

Speak up ინგლისურენოვანი, საერთაშორისო პროექტია, რომლის მიზანიცაა ინგლისური ენის გაღრმავება და ლიდერული უნარ–ჩვევების განვითარება. პროექტი მსოფლიოს მრავალ ქვეყანაშია ცნობილი და წელს, პირველად საქართველოშიც ჩატარდა.

მან საქართველოს ყველა დიდი ქალაქი მოიცვა და როგორც სტუდენტებს, ასევე სკოლის მოსწავლეებს მისცა შანსი, 2 თვიანი ტრენინგ–კურსები გაევლოთ.

Speak up ახალციხეში 16 ივნისს დაიწყო და სხვა და სხვა მიზეზების გამო დახურვითი ცერემონიალი დაგვიანებით გაიმართა. პროექტი სპორტისა და ახალგაზრდობის საქმეთასამინისტროს მხარდაჭერით ჩატარდა და სამთავრობო ცვლილებების გამო მისი ბედი გაურკვეველია.

პროექტის ავტორის, თამარ კანაშვილის თქმით, speak up-მა საზოგადოების დიდი მოწონება დაიმსახურა და ძალიან დიდია სურვილი კვლავაც გაგრძელდეს.

პროექტს ახალციხეში დაახლოებით 90 მონაწილე ჰყავდა და თითოეულ მათგანს სერთიფიკატი გადაეცა. დაჯილდოება ალა ფურშეტით დასრულდა.

[ნინო ზედგინიძე, ახალციხე]