ახალციხეში ინგლისური ენის შემსწავლელი პროგრამა დასრულდა

„ინგლისური ენის შესწავლის ხელმისაწდომობის სასტიპენდიო პროგრამის“ მონაწილე 25 ბავშვს ამერიკის საელჩოს საზოგადოებასთან ურთიერთობის განყოფილების უფროსმა კორტნი ოსტრიანიმ და პროგრამის მენეჯერმა ნანა იოსელიანმა სერთიფიკატები და ინგლისური ენის წიგნები გადასცეს.

პროგრამაში მონაწილე ბავშვებმა ამერიკის საელჩოს წარმომადგენლებს ორი წლის განმავლობაში განხორციელებული აქტივობების, ასევე საზაფხულო და ზამთრის ბანაკებში ყოფნის ამსახველი ფოტოკოლაჟი აჩვენეს.

„ეს პროგრამა სახელმწიფო დეპარტამენტის ერთ–ერთი ძალიან მნიშვნელოვანი პროგრამაა რომელიც მსოფლიოს ბევრ ქვეყანაში ხორციელდება.
არა ერთ გამოსაშვებ საღამოზე ვყოფილვარ, მაგრამ ამდენი აქტიური ბავშვი არ მინახავს. დიდი იმედი მაქვს, რომ მათ მომავალში სხვადასხვა სარბიელზე ვიხილავ“, – ამბობს ამერიკის საელჩის საზოგადოებასთან ურთიერთობის განყოფილების უფროსი კორტნი ოსტრიანი.

„ინგლისური ენის შესწავლის ხელმისაწდომობის სასტიპენდიო პროგრამა - English Access Microscholarship Program“ რომელსაც ამერიკის საელჩი აფინანსებს ახალციხეში ოთხი წელია ხორციელდება. პროგრამის პირველი გამოშვება ორი წლის წინ იყო. ახალციხის მასშტაბით აღნიშნულ პროგრამაში სულ 41 ბავშვი ჩაერთო.

პროგრამის მენეჯერი ნანა იოსელიანი ამბობს, რომ პროგრამაში მონაწილე ახალგაზრდები წარმატებულები ხდებიან.

„პროგრამა ოთხ წელზე მეტია საქართველოს 10 რეგიონში ხორციელდება. ქვეყნის მასშტაბით პროგრამაში ეკონკომიურად და სოციალურად გაჭირვებული ოჯახებიდან სულ 250 ბავშვი ჩაერთო. ასაკობრივი ჯგუფი 13-დან 16-წლამდე განისაზღვრება“, – ამბობს ნანა იოსელიანი და აქვე ამატებს, რომ დიდი იმედი აქვს, რომ ახალციხეში „ინგლისური ენის შესწავლის ხელმისაწდომობის სასტიპენდიო პროგრამა კიდევ გაგრძელდება.



[მანანა სარაშვილი, ახალციხე]