კონფერენცია ინგლისური ენის მასწავლებელთა დასახმარებლად

ინგლისური ენის მასწავლებლების პირველ მასშტაბურ რეგიონულ კონფერენციას სამცხე-ჯავახეთის 70-მდე ინგლისური ენის მასწავლებელი დაესწრო.

კონფერენციაზე,რომელიც სამ სესიად გაიმართა, ძირითადად, ყურადღება მასწავლებლის კვალიფიკაციის ამაღლებასა და სწავლების ეფექტურობის გაზრდაზე გამახვილდა.

ორგანიზატორებმა პედაგოგებს მიაწოდეს ინფორმაცია, როგორ უნდა იმუშაონ პირველკლასელებთან; რა ახალი ტექნიკა და ხერხები შეიძლება გამოიყენონ და როგორ უნდა შეძლონ ინგლისური ენის ეფექტური გამოყენება კომუნიკაციაში.

„ეს იყო ძალიან ნაყოფიერი და დატვირთული კონფერენცია”, - ასე შეაფასა შეხვედრა ინგლისური ენის სპეციალისტმა ვოლტერ გადისმა.

მისივე განმარტებით, კონფერენციამ სამცხე-ჯავახეთის მასწავლებლებს საშუალება მისცა უკეთ გაეცნოთ ერთმანეთი და გაემდიდრებინათ ცოდნა.

კონფერენციას ესწრებოდნენ მშვიდობის კორპუსის მოხალისეებიც, რომლებიც წლებია ახალქალაქელ პედაგოგებს ინგლისური ენის სწავლებაში ეხმარებიან.

- ”ჩემზე დიდ შთაბეჭდილებას ახდენს ქართველი მასწავლებლების ერთგულება პროფესიის მიმართ“, -ამბობს მშვიდობის კორპუსის მოხალისე მელისა კულმანი.

კონფერენცია ინგლისური ენის მასწავლებელთა ახალციხის ფილიალის თავმჯდომარის გულიკო ჯანოვას ინიციატივით შედგა. შეხდვედრა ამერიკის საელჩოს ფინანსური მხარდაჭერით გაიმართა.

- „მთავრობის გადაწყვეტილებამ, რომ ყველა ბაშვმა უნდა მიიღოს B2 დონის სერთიფიკატი, დიდი პასუხისმგებლობის ქვეშ დააყენა მასწავლებელთა საქმიანობა სკოლაში,- ამბობს გულიკო ჯანოვა.

მისივე თქმით, სკოლებში უნდა მომზადდეს კარგი კადრები, რომ უნივერსიტეტმა შეძლოს ამ დონეზე სტუდენტების აყვანა: ”ამიტომ გადავწყვიტეთ რაც შეძლება მეტი აქტივობები გვესწავლებინა მასწავლებლებისთვის. ვფიქრობთ, მასწავლებლები შეძენილ ცოდნას საქმიანობაში დანერგავენ და გაკვეთილი უფრო ეფექტური და ხარისხიანი იქნება“.

კონფერენციის დასასრულს პედაგოგებს საჩუქრად ინგლისური ენის წიგნები და სერთიფიკატები გადაეცათ.

ერთდღიანი კონფერენცია ახალციხის სასწავლო უნივერსიტეტის მეორე კორპუსში ჩატარდა. იგივე ტიპის კონფერენციას აპრილის თვეში ქვემო ქართლმა, ქალაქ რუსთავმა უმასპინძლა.

”ამერიკის საელჩო ცდილობს მსგავსი კონფერენციები ყოველწლიურად დააფინანსოს“, - ამბობს ამერიკის საელჩოს განათლების პროგრამების კოორდინატორი საზოგადოებასთან ურთიერთობის განყოფილებაში სოფიკო ბზიშვილი.

[თიკო ზაზაძე, ახალციხე]