‘ყავის მომდუღებლების შტატებს ამატებთ?’– ხმაურიანი სხდომა ახალციხის მუნიციპალიტეტის საკრებულოში

საკრებულოს სხდომაზე 10 საკითხი განიხილეს. აქედან ერთ–ერთი, ახალციხის მუნიციპალიტეტის გამგეობისა და მისი სტრუქტურული ერთეულების საშტატო ნუსხაში ცვლილებების შეტანას ეხებოდა, კერძოდ 7 ახალი თანამშრომლის დამატებას.

ახალციხის მუნიციპალიტეტის გამგებლის ინიციატივით, ურაველში, ვალესა და სხვილისში, გამგებლის წარმომადგენლებს თანაშემწეები და ინფრასტრუქტურის სამსახურის თანამშრომლები ემატებათ, გამგეობის საზოგადოებასთან ურთიერთობის სამსახურს კი სპეციალისტი.
საკითხს საკრებულოს უმცირესობის პროტესტი მოჰყვა.

„თანამშრომლები რომ არ დავამატოთ, ვინც მუშაობენ ახლა, ისინი ვერ ასრულებენ ამ მოვალეობებს? იქნებ ამ შემადგენლობით ახერხებენ ეს უნიკალური თანამშრომლები მუშაობას? რატომ ამატებთ 7 შტატს? ვახალისებთ ამ ადამიანებს, თუ ყავის მომდუღებლებს ვიმატებთ? “– განაცხადა „ერთიანი ნაციონალური მოძრაობის“ წარმომადგენელმა მაკა სუდაძემ.

ამ განცხადების შემდეგ, „ერთიანი ნაციონალური მოძრაობის“ წარმომადგენლებმა სხდომა დატოვეს.

ახალციხის მუნიციპალიტეტის გამგებელი ზაზა მელიქიძე ამბობს, რომ წარმომადგენლებს თანაშემწეებს იმ სოფლებში უნიშნავენ, სადაც მოსახლეობა 2000–ზე მეტს აღწევს.

საზოგადოებასთან ურთიერთობის სამსახურში სპეციალისტის დამატებით კი მეტი ადამიანი იქნება საქმის კურსში სოფლებში განვითარებულ მოვლენებზე.

ოპოზიციის პროტესტის შემდეგ საკრებულოს უმრავლესობამ აღნიშნული გადაწყვეტილება ერთ ხმად მიიღო.

[ვარლამ წიკლაური, ახალციხე]