ახალციხის მუნიციპალიტეტის საკრებულოს პირველი სხდომა უმცირესობის გარეშე

ახალციხის მუნიციპალიტეტის საკრებულოს სხდომა დღეს, 13 იანვარს გაიმართა. სხდომაზე ის წინა საპროექტო წინადადებები უნდა განეხილათ, რომელიც სოფლების: წყრუთი – ანის, წყრუთი – ჭვინთა – ელიაწმინდის, ტატანისი–სვირი–ბოგისა და ზიკილიის საავტომობილო გზებისა და მინაძე – ჭაჭარაქის სატუმბი სადგურის სარეაბილიტაციო სამუშაოებს შეეხება.

ინფრასტრუქტურის, სივრცითი მოწყობის, არქიტექტურისა და მშენებლობაზე ზედამხედველობის სამსახურის უფროსმა ნოდარ ბალახაშვილმა სხდომის დაწყებისას აღნიშნა, რომ წინადადებების მოწონების შემთხვევაში პრიორიტეტებს რეგიონული განვითარებისა და ინფრასტრუქტურის სამინისტროს გადაუგზავნიდა. სამინისტროს მოწონების შემთხვევაში კი უკვე პროექტებს ძირითადად სამ წელიწადზე გადაანაწილებდა.

„წყრუთი–ანის საავტომობილო გზის 6–კილომენტრიანი მონაკვეთი 1.900.000 ლარის ღირებულებისაა. მიმდინარე წლისთვის ჩავსვით 600.000 ლარის სამუშაოები, 800.000–ის განხორციელდება მომავალ წელს, 500.000–ის კი 2017 წელს. ზიკილია 150.000 ლარის ღირებულებისაა და ერთ წელზე გავთვალეთ. ტატანისი–სვირი–ბოგის საავტომობილო გზაზე წელს დაიხარჯება 300.000, მომავალ წელს 700.000 და 2017 წელს მილიონი იქნება“, – განაცხადა ნოდარ ბალახაშვილმა.

აღნიშნული პროექტების განხილვის შემდეგ, „ერთიანი ნაციონალური მოძრაობის“ წარმომადგენელმა კახაბერ მოდებაძემ განაცხადა, რომ პროექტების შესახებ დეტალური ინფორმაცია არ ჰქონდათ. დეტალური ინფორმაცია მხოლოდ სხდომის დაწყებამდე 15 წუთით ადრე მიიღეს, ამიტომ, „ნაციონალები“ სხდომის გადადებას ითხოვდნენ. ბალახაშვილი სხდომის გადადებას იმ მოტივით არ დაეთანხმა, რომ სამინისტროში ინფორმაციის გადაგზავნა გვიანდებოდა.

ბალახაშვილის განცხადების შემდეგ, „ნაციონალური მოძრაობის“ წარმომადგენლებმა საკრებულოს სხდომა დატოვეს.

„მუდმივად ასე ხდება, ბიუროს სხდომა ტარდება საკრებულოს სხდომის დაწყებამდე ერთი საათით ადრე, შესაბამისად, დოკუმენტაცის გაცნობის საშუალება არ გვეძლევა. დღესაც, ეს საკითხები, ბიუროს სხდომაზე ჩვენს წარმომადგენელს მიცეს და 15 წუთში სხდომა დაიწყო“, – ამბობს კახაბერ მოდებაძე.

„ნაციონალების“ პროტესტის მიუხედავად, საკრებულოს სხდომა გაგრძელდა. უმრავლესობამ საკითხს კენჭი უყარა და წარმოდგენილ წინადადებებს მხარი დაუჭირა.

[მანანა სარაშვილი, ახალციხე]