განახლებული კათოლიკური ტაძარი ახალციხეში

ახალციხეში კათოლიკე მრევლი წირვა-ლოცვებს ათული წლის შემდეგ, ტაძარში პირველად დაესწრება. რაბათში წმინდა ჯვრის სახელობის კათოლიკური ტაძარი აღდგა. თუმცა, მე-13 საუკუნის ეკლესია, რომელიც მოგვიანებით, მე-16 საუკუნეში განაახლეს და წლების განმავლობაში არა ერთხელ დაანგრიეს, მიმდინარე წლის ექვს ოქტომბერს სავარდის ღვთისმშობლის სახელობის ტაძრად ეკურთხა.

აქამდე კათოლიკე მრევლი ახალციხეში ორბელიანის ქუჩაზე სალოცავად მოწყობილ ბინაში იკრიბებოდა. კათოლიკეები რაბათში ტაძრის აღდგენაზე ნებართვას 5 წლის განამვლობაში ელოდნენ. საერსტავრაციო სამუშაოები ეკლესიის აღსადგენად 2010 წლის აგვისტოში დაიწო და ორ წელიწადს გაგრძელდა.

ტაძრის რესტავრაციის პარალელურად ეკლესიის გვერდით მონასტრის მშენებლობაც მიმდინარეობდა. ჩაკეტილი კათოლიკური მონასტერი, რომელმაც ფუნქციონირება ტაძართან ერთად დაიწყო, საქართველოში ერთადერთია. აქ ოთხმა იტალიელმა მონაზონმა დაიდო ბინა და მათ ჩაკეტილი მონასტრული წესებიდან გამომიდანრე გარესამყაროსთან ურთიერთობა ეკრძალებათ. მონასტრის ერთი კარი ტაძარში გადის, მეორე კი იმ მცირე ნაკვეთში, რომელსაც მონაზვნები დაამუშავებენ. ლოცვასთან ერთად აქ დედები ხელსაქმესაც გააკეთებენ. მათთან ერთად ცხოვრობს ქართველი მორჩილიც და მონასტერში იმედოვნებენ, რომ მალე ისიც მონაზვნად აღიკვეცება.

გარდა იტალიელი მონაზვნებისა, ახალციხეში კიდევ სამი კათოლიკე მონაზონია, მათ შოროს სამი ფრანგია, ერთი კი კონგოდანაა.

რაც შეეხება კათოლიკე მღვდლებს. სულ საქართველოში ოთხი ქართველი კათოლიკე მღვდელია, აქედან სამი მესხეთში წირავს, ერთი - თბილისშია. ტაძრის წინამძღვარის, მესხეთის დეკანოზისა და ღვთისმეტყველების დოქტორის ზურაბ კაკაჩიშვილის თქმით, ეს იმიტომ, რომ მესხეთი კათოლიკეთა ცენტრია.

ახლადგახსნილ ტაძარში 40-მდე სკამი დგას და როგორც კაკაჩიშვილი ამბობს, მიუხედავად იმისა, რომ სულ რამდენიმე დღეა რაც ეკლესიამ ფუნქციონირება დაიწყო, თითქმის სულ სავსეა.

მისივე თქმით, ტაძარი მრევლის შემოწირულობით აღდგა და ამ საქმეში განსაკუთრებული დახმარება გერმანიიდან ორმა ეპერქიამ გაუწიათ.

ტაძარი საზეიმო ვითარებაში 6 ოქტომბერს გაიხსნა და ის ამიეკავკასიის ლათინ-კათოლიკეთა სამოციქულო ადმინისტრატორმა ეპისკოპოსმა ჯუზეპე პაზოტომ აკურთხა. ღონისძიებას სხვადასხვა ქვეყნებიდან ასობით მოწვეული საერო თუ სასულიერო პირი ესწრებოდა. სტუმრებს შორის იყვნენ ადგილობრივი თვითმმართველობისა და კულტურის სამინსიტროს წარმომადგენლებიც.

ახალციხეში კათოლიკური წირვა-ლოცვა ახლადგახსნილ ტაძართან ერთად ორბელიანის ქუჩაზეც ჩვეულებრივ გაგრძელდება. ეს მათთვის, ვისაც ტაძრამდე მისვლა გაუჭირდება.



[თამუნა უჩიძე, ახალციხე]