სამცხე-ჯავახეთში კათოლიკური შობა იზეიმეს

გუშინ ღამის 12 საათზე მესხეთში მოქმედ ხუთ კათოლიკურ ტაძარში საშობაო წირვა-ლოცვა ერთდროულად დაიწყო. ვალეში, არალში, უდესა და ვარგავში მოქმედი კათოლიკური ტაძრებისგან განსხვავებით, წელს წირვა ახალციხეში წმინდა სავარდის ღვთისმშობლის სახელობის კათოლიკურ ტაძარში პირველად ჩატარდა. აქამდე კათოლიკე მრევლი ახალციხეში ორბელიანის ქუჩაზე სალოცავად მოწყობილ ბინაში იკრიბებოდა.

ახალციხის ისტორიულ უბანში, რაბათში ახლად აშენებულმა ტაძარმა ფუნქციონირება 6 ოქტომბერს დაიწყო.

”წლევანდელი შობა არის განსაკუთრებით სასიხარულო მოვლენა ახალციხელი მრევლისთვის”, - ამბობს ტაძრის წინამძღვარი და მესხეთის დეკანოზი ზურაბ კაკაჩიშვილი.

ახალ ტაძარში საშობაო წირვას მრევლი არამხოლოდ ახალციხიდან, არამედ ვალედან, ივლიტიდან, აბასთუმნიდან და ჩეხეთიდანაც კი ესწრებოდა. საშობაო ცერემონიას დაესწრნენ მართლმადიდებელი სტუმრები ახალციხიდან და თბილისიდანაც.

წირვის დაწყებამდე ბავშვებმა ტაძარში იესოს დაბადების შესახებ მცირე სპექტაკლი წარმოადგინეს.

ამ დღისთვის კათოლიკე მრევლი 4 კვირის განმავლობაში ემზადება, ამ პერიოდს კათოლიკეები ადვენტს უწოდებენ.[ადვენტი ლათინური სიტყვაა და სასიხარულო მოლოდინისთვის მზადებას ნიშნავს].

წირვის დასრულების შემდეგ მრევლს გოზინაყითა და მონაზვნების გამომცხვარი ნამცხვრით გაუმასპინძლდნენ.

წირვა სავარდის სახელობის ტაძარში გამთენიისას, 8 საათზე დასრულდა.

[თამუნა უჩიძე, ახალციხე]