რაბათში კათოლიკური ეკლესიის დღესასწაული აღინიშნა [ფოტო]

რაბათში არსებული კათოლიკური ტაძრის დღესასწაულს, მრევლი 2012 წლიდან ყოველი წლის 7 ოქტომბერს აღნიშნავს. ღვთისმშობლის სავარდის სახელზე იგი რვა წლის წინ, ნანგრევების აღდგენის შემდეგ ეკურთხა, მანამდე კი წმიდა ჯვრის სახელობის იყო.

ტაძარში საზეიმო ლიტურგია კათოლიკე ეკლესიის ეპისკოპოსმა, ჯუზეპე პაზოტომ სხვა სასულიერო პირებთან ერთად აღავლინა. წირვისას მრევლისთვის ვატიკანის ელჩმა საქართველოში, ჟოზე აველინო ბეტანკურმა იქადაგა და ხაზი გაუსვა სავარდის (კრიალოსანზე წარმოსათქმელი ლოცვა) ისტორიულ მნიშვნელობას.

კათოლიკე ეკლესიაში ოქტომბერი ღვთისმშობლის თვედ არის მიჩნეული. ამიტომ მორწმუნეები მთელი თვის განმავლობაში სავარდზე, იგივე კრიალოსანზე ღვთისმშობლის მიმართ ლოცულობენ.

ისტორიულად, სავარდის დღესასწაულის დაწესება ეპანტოს ბრძოლას უკავშირდება, რომელიც 1571 წლის 7 ოქტომბერს გაიმართა. ეს იყო უკანასკნელი დიდი ბრძოლა საღვთო ლიგასა და ოსმალეთს შორის. იმისათვის, რომ მცირერიცხოვან საღვთო ლიგას გამარჯვება მოეპოვებინა, მაშინდელმა პაპმა პიუს V-მ ქრისტიანებს სავარდზე ლოცვისაკენ მოუწოდა. ბრძოლაში ოსმალეთი დამარცხდა, 7 ოქტომბერი კი იმავე პაპმა სავარდის ღვთისმშობლის დღესასწაულად გამოაცხადა.

რაბათის კათოლიკური ტაძარი მეცამეტე საუკუნეშია აშენებული. აქ ადგილობრივი კათოლიკე მოძღვარი ივანე გვარამაძე სწირავდა. იმ პერიოდში ეკლესია წმიდა ჯვრის სახელობის იყო.

ტაძრის აღდგენითი სამუშაოები 2010 წელს დაიწყო და ორი წლის შემდეგ დასრულდა. ახლა მის გვერდით ბენედიქტელ დედათა მონასტერი ფუნქციონირებს. ტაძარში ყოველდღიურ წირვებს კი კაპუცინელთა ორდენის მღვდლები აღავლენენ, რომლებიც ასევე ახალციხეში ცხოვრობენ.




ვატიკანის ელჩი




[თაკო ფეიქრიშვილი]