ღვთისმშობლის შობის დღესასწაული ვალეში [Photo]

ღვთისმშობლის შობის დღესასწაულს კათოლიკე მრევლი 8 სექტემბერს აღნიშნავს. ამ დღეს, საქართველოში მცხოვრები კათოლიკეები განსაკუთრებულად ვალეში ზეიმობენ, რადგან აქ ღვთისმშობლის შობის სახელობის კათოლიკური ეკლესია ფუნქციონირებს.

დღეს ამ ტაძარში წირვა ამიერკავკასიის კათოლიკეთა სამოციქულო ადმინისტრატორმა, ეპისკოპოსმა ჯუზეპე პაზოტომ და საქართველოში მოღვაწე მღვდლებმა აღავლინეს.

სადღესასწაულო წირვისთვის კათოლიკე მრევლი ვალეში ქვეყნის სხვადასხვა სამრევლოებიდან ჩამოვიდა. წირვას "ევროპული საქართველოს“ წევრები და მხარდამჭერებიც ესწრებოდნენ, მათ შორის იყო პარტიის ლიდერი გიგი უგულავა.

ლიტურგიაზე, მრევლისათვის ვატიკანის ელჩმა საქართველოში, ჟოზე აველინო ბეტენკურიმ იქადაგა: "მოხარული ვარ, რომ თქვენთან ერთად ვარ, რათა ვიზეიმოთ თქვენი სამრევლოს მფარველი წმინდანის დღესასწაული. ასევე ძალიან მიხარია, რომ ვარ კათოლიკეებთან და ჩვენს მართლმადიდებელ ძმებთან ერთად, რომლებიც ესწრებიან დღეს წირვას".

ვალეში ღვთისმშობლის შობის კათოლიკური ეკლესიის მშენებლობა 1860 წელს დაიწყეს, 1862 წელს დასრულდა. ტაძრის მშენებლი მოძღვარი სტეფანე ზაქარიანი იყო.

ქრისტიანული სწავლების მიხედვით, ღვთისმშობელი გალილეის პატარა ქალაქ ნაზარეთში დაიბადა. მამა, იოაკიმე, დავით მეფის ტომიდან იყო, ხოლო დედა, ანა - პირველი მღვდელმთავრის აარონის შთამომავალი.

ღვთისმოშიშ ცოლ-ქმარს შვილი ხანდაზმულ ასაკში შეეძინათ. მათ აღთქმა დადეს, თუ ღმერთი შვილს მისცემდათ, ახალშობილს ტაძარში მსახურებისთვის უფალს მიუძღვნიდნენ. უფალმა იოაკიმესა და ანას ლოცვა-ვედრება შეისმინა. მთავარანგელოზმა გაბრიელმა ამცნო ანას, რომ იგი მუცლად-იღებდა. ყოვლადწმინდა ღვთისმშობელი საკუთარ სახლში სამი წელი იზრდებოდა.













[თაკო ფეიქრიშვილი, ახალციხე]