ახალციხის ციხეში დღეიდან ბილეთების ფასი შეიცვალა

ახალი ტარიფების მიხედვით, ზედა ციხის დათვალიერებისთვის ვიზიტორი 6 ლარს გადაიხდის, სტუდენტი 3 ლარს, მოსწავლე კი 2 ლარს. აქამდე ქართველი ვიზიტორები 5 ლარს, უცხოელები 7 ლარს, სტუდენტები 2 ლარს, მოსწავლეები კი 1 ლარს იხდიდნენ.

უცვლელი დარჩა გიდის მომსახურება, ქართულ ენოვანი გიდის დაქირავება კვლავ 10 ლარი; უცხოურ ენოვნის კი 20 ლარი იქნება.

ადმინისტრაციის განცხადებით, შესაბამისი მოწმობის წარდგენით, ციხის ორივე ნაწილის დათვალიერება უფასო იქნება:

საქართველოსა და უცხოეთის მუზეუმების თანამშრომელთათვის;
იძულებით გადაადგილებულ პირთათვის;
6 წლამდე ასაკისა და მიუსაფარი ბავშვებისათვის;
სოციალურად დაუცველ პირთათვის;
ომის ვეტერანებისთვის;
შეზღუდული შესაძლებლობის მქონე პირთათვის.

„ახალციხის ციხის“ დირექტორის ზაზა თამარაშვილის განმარტებით, ფასების ცლილება ორმა ფაქტმა განაპირობა, გაითვალისწინეს საქართველოს სახალხო დამცველისა და ახალგაზრდა იურისტთა ასოციაციის რეკომენდაცია, რომლის თანახმად, ფასი დისკრიმინაციული იყო და გაათანაბრეს. ასევე, ბილეთის ფასები შესაბამისობაში მოიყვანეს სხვა ტურისტულ ობიექტებთან და მუზეუმებთან მიმართებაში.

ახალციხის ციხე ორი ნაწილისაგან შედგება, ზედა და ქვედა ციხე. ქვედა ციხეში მომსახურების ობიექტებია, – კაფეები და რესტორნები, ზედა ციხეში კი ისტორიული ობიექტები. შესვლა ფასიანი მხოლოდ ციხის ზედა ნაწილშია.

[sknews.ge]