ახალციხის ციხის მონახულება გაძვირდა

ციხეში შესვლის ფასებმა 13 იანვრიდან მოიმატა. ახალციხის ციხის საზოგადოებასთან ურთიერთობის სამსახურის უფროსი ლილი გოზალიშვილი განმარტავს, რომ ბილეთის ღირებულება ახალციხის ციხის ადმინისტრაციამ და ქალაქ ახალციხის მერიამ ურთიერთშეთანხმებით გაზარდეს.

კითხვაზე, რატომ გაძვირდა ახალციხის ციხეში შესვლა, ახალციხის მერის პირველი მოადგილე ზაზა თამარაშვილი გვპასუხობს, რომ ეს ახალციხის ციხის მენეჯმენტისა და ფინანსური მდგომარეობის მოწესრიგებას უკავშირდება: „ახალციხის ციხე ძალიან დიდ დაფინანსებას იღებდა ჩვენი ბიუჯეტიდან. წელს შევამცირეთ, სუბსიდიის სახით 200.000 ლარს ვაძლევთ. დროა დავიწყოთ თანხების ოპტიმალური გამოყენება და სწორედ ეს არის ნაწილობრივი ღონისძიება მენეჯმენტის გაუმჯობესებისთვის“.

ბილეთის ღირებულება არ შეცვლილა სხვა კატეგორიის ვიზიტორებისთვის. სკოლის მოსწავლეებს ისევ ერთ ლარად შეუძლიათ ციხეში შესვლა, სხვა ვიზიტორებს (საქართველოს მოქალაქეებს) 5 ლარად, მრავალჯერადი მომსახურება დღის განმავლობაში 7 ლარის ღირს, გიდის მომსახურება ქართულ ენაზე 10 ლარი, უცხოურ ენაზე კი 20 ლარია.

ახალციხის ციხეში, პირადობის დამადასტურებელი მოწმობის წარდგენის შემთხვევაში, შესვლა უფასოა ICOM – ის წევრებისთვის ( მუზეუმებისა და მუზეუმების პროფესიონალთა საერთაშორისო ორგანიზაცია), საქართველოს და უცხოეთის მუზეუმის თანამშრომლებისთვის, 6 წლამდე ასაკისა და მიუსაფარი ბავშვებისთვის, სოციალურად დაუცველ და შეზღუდული შესაძლებლობების მქონე პირთათვის, ასევე, იძულებით გადაადგილებულ პირთა და ომის ვეტერანებისთვის.

შეგახსენებთ, რომ ახალციხის ციხეზე ცვლილებები მიმდინარე წლის იანვრიდან დაიწყო. ციხიდან 13 თანამშრომელი გაათავისუფლეს, რომლებიც წყალმომარაგების, ელექტროგაყვანილობისა და გამწვანების მიმართულებით მუშაობდნენ. მოგვიანებით ციხეში 5 შტატი შემცირდა, დარჩენილ შტატებზე კი ანაზღაურებამ დაიკლო.

[მანანა სარაშვილი, ახალციხე]