ახალციხის ციხეში საპირფარეშო ფასიანი ხდება

ახალციხის მერის გიორგი კოპაძის განმარტებით, გადაწყვეტილების მიღება ახალციხის ციხის ტერიტორიაზე დამთვალიერებლის მიერ საპირფარეშოების დაზიანებამ გამოიწვია.

„ვარდების ფესტივალის დროს საუკეთესო დანადგარები დააზიანეს. ჩემდა სამწუხაროდ, ეს გოგონებმა გააკეთეს. ამის დამადასტურებელი ვიდეოკადრებიც გვაქვს. ეს არის არასწორი და ამისთვის ახალგაზრდები დაისჯებოდნენ კიდეც, მაგრამ თავი შევიკავეთ და არ მივეცით საქმეს მსვლელობა“,– განმარტავს გიორგი კოპაძე.

ახალციხის ციხის ტერიტორიაზე „ვარდებისა და მშვიდობის ფესტივალი“ 27, 28 და 29 აგვისტოს ჩატარდა, სწორედ ამ პერიოდში დაზიანდა საპირფარეშოები. ზარალმა ჯამში 850 ლარი შეადგინა.

ახალციხის ციხის ადმინისტრაციაში განმარტავენ, რომ თანხას ფესტივალის ორგანიზატორები აანაზღაურებენ.

„მატერიალურ–ტექნიკური რესურსების მართვის სამსახურის უფროსის მოვალეობის შემსრულებელმა გელა ბლუაშვილმა და ფესტივალის წარმომადგენელმა ერთად დაიანგარიშეს. მათ უარი არ უთქვამთ გადახდაზე და ერთდროულად აღადგენენ დაზიანებულ ნაწილებს“, – განმარტავს ახალციხის ციხის საზოგადოებასთან ურთიერთობის სამსახურის უფროსი ლილი გოზალიშვილი.

მისივე თქმით, იმ შემთხვევაში თუ ციხის ტერიტორიაზე საპირფარეშოებით სარგებლობა ფასიანი გახდება, ეს მხოლოდ ქვედა ციხეს შეეხება, იქ სადაც კომერციული ობიექტებია განთავსებული. რა იქნება მომსახურების ფასი ჯერ გადაწყვეტილი არ არის.

„მიდის მოლაპარაკებები, ალტერნატიულ გზებს ვეძებთ, როგორ შეიძლება, რომ უკეთესი იყოს. იმ ტერიტორიაზე , სადაც უფასოა შესვლა, მეტი ყურადღების მიქცევა უნდა. ციხის ზედა მხარეზე, სადაც ბილეთიანი დამთვალიერებელი შედის, იქ უფასო საპირფარეშო იქნება“, – ამბობს ლილი გოზალიშვილი.

[თნათინ ზაზაძე, ახალციხე]