‘ამ ქვეყანაში მასხრად გვიგდებენ!’– არლელები მიწის საკუთრების პრობლემაზე

არალში მაცხოვრებლებმა საჯარო რეესტრის წინააღდეგ სასამართლოში საჩივარი შეიტანეს. უწყებას ადგილობრივები ნაკვეთების დარეგისტრირებაზე უარის თქმის გამო ედავებიან.

ამ პრობლემასთან დაკავშირებით, დღეს, 7 აპრილს „ახალგაზრდა იურისტთა ასოციაციამ“, იურისტებთან და ასოციაცია „მწვანე ალტერნატივას“ წარმომადგენელთან ერთად, ადვოკატირების მიზნით, არლელებთან შეხვედრა გამართა.

„რა უნდა ამ მიწასთან საერთოდ „საქნახშირს“, იმ მიწაზე, სადაც მე ვხნავ და ვთესავ, ქვანახშირი უნდა დათესონ?! ქვანახშირს მიაქვს ვალე, მაგრამ იქ მიწის ზედაპირზე საკუთრებასთან და მის დამუშავებასთან დაკავშირებით პრობლემა არავის ექმნება. თუ ჩვენ ტერიტორიაზეც ქვა–ნახშირი მოიპოვება ჩაძვრენ და მოიპოვონ, ვინ დაუშალა?! ჩვენ ჩვენ მიწაზე ნუ გვედავებიან, – აცხადებს არალში მცხოვრები შოთა ფეიქრიშვილი და ამატებს, – ლიცენზიანტი მეუბნება ჩემი მამა–პაპის მიწაზე, აქ მე ვარ და შენ კომპენსაცია არ გეკუთვნისო. ამ ქვეყანაში მასხრად გვიგდებენ!“
იურისტები შეხვედრაზე ადგილობრივების პრობლემებში უკეთ გაერკვნენ.

„დღევანდელი შეხვედრის მიზანი იყო დაგვეკონკრეტებინა რა პრობლემა აწუხებს სოფელ არალში მაცხოვრებელ იმ მოსახლეობას, რომლის მიწის ნაკვეთებიც მათ საკუთრებაში ვერ დარეგისტრირდა“, – აცხადებს „ახალგაზრდა იურისტთა ასოციაციის წარმომადგენელი“ ქეთი ბებიაშვილი.
მისი განცხადებით, მომავალ შეხვედრაზე სახელმწიფოს, „ბიპისა“ და „საქნახშირის წარმომადგენლებიც ჩაერთვებიან: „ასე უკეთ დავინახავთ რა მოცემულობა გვაქვს და პრობლემის გადაჭრა როგორ შეგვიძლია“.

შეგახსენებთ, რომ სამხრეთ კავკასიური მილსადენის გაფართოების პროექტის მშენებლობისას, არალში მცხოვრები მოსახლეობის ნაწილი ზარალდება, თუმცა კომპენსაციას ვერ იღებს. მიწაზე, რომელსაც გლეხები ორი ათეული წელია ამუშავებენ, „საქნახშირს“ 40–წლიანი ლიცენზია აქვს მიღებული. ბიპი პროექტის მშენებლობას იწყებს, თუმცა, საკითხი თუ ვინ მიიღებს ლიცენზიას – გლეხები თუ საქნახშირი – ჯერ ისევ კითხვის ნიშნის ქვეშაა.

[თამუნა უჩიძე, ახალციხე]