ჩამანიანების სარდაფში წყლის ჟონვა შეწყდება

ახალციხეში, ანთიმოზ ივერიელის შვიდ ნომერში უკვე ოთხი თვეა წყლის მილია დაზიანებული, რის გამოც სახლის სარდაფი და გარე ქუჩა იტბორება. ამის შესახებ „სამხრეთის კარიბჭემ“ სტატია 22 ივლისს მოამზადა.

23 ივლისს, საქართველოს გაერთიანებული წყალმომარაგების კომპანიის სამცხე–ჯავახეთის რეგიონული ფილიალის წარმომადგენლები ანთიმოზ ივერიელის 7 ნომერს, სპეციალური მოწყობილობებით ესტუმრნენ და პრობლემის კვლევა დაიწყეს. ცნობილია, რომ შემთხვევის ადგილზე მათ ფოლადის დაზიანებული მილი აღმოაჩინეს. ასევე, სპეციალური მოწყობილობით დაადგინეს, რომ მილიდან ნამდვილად გამოდის წყალი, თუმცა ძლიერი ჟონვა არაა: „ასფალტის ამოჭრაა საჭირო იმის ზუსტად დასადგენად, ჩამანიანების სარდაფში გარე გზიდან შედის წყალი, თუ - არა“ - ამბობს, დიაგნოსტიკურ–ანალიტიკური სამმართველოს სპეციალისტი თემურ ინასარიძე.


როგორც საქართველოს გაერთიანებული წყალმომარაგების კომპანიის სამცხე–ჯავახეთის ფილიალის რეგიონული ტექნიკური სამსახურის უფროსმა გურამ შეშაბერიძემ „სამხრეთის კარიბჭესთან“ საუბრისას თქვა, ასფალტის ამოსათხრელად საჭიროა მერიის ნებართვა, ხოლო გზის გადასაკეტად - პოლიციის, ამიტომ ეს პრობლემა შემდეგ კვირას მოგვარდება.

ანთიმოზ ივერიელის 7 ნომერში მცხოვრებ მარინა ჩამანიანს იმედი აქვს, რომ პრობლემა უახლოეს მომავალში მოგვარდება.

[ელისაბედ მოდებაძე, ახალციხე]