სამცხე–ჯავახეთს იაპონიის დელეგაცია ესტუმრა

შეხვედრა ახალციხის ციხეზე შედგა. იაპონიის საერთაშორისო თანამშრომლობის სააგენტოს - JICA - ს დელეგაცია სამცხე–ჯავახეთის გუბერნატორს, მუნიციპალიტეტების გამგებლებს, სოფლის მეურნეობის სამინისტროს რეგიონული სამსახურების, მხარეში მოქმედი სასოფლო-სამეურნეო კოოპერატივების, ტურისტული სააგენტოებისა და არასამთავრობო ორგანიზაციების წარმომადგენლებს შეხვდა.

ჰოკაიდოდან ჩამოსულმა სამთვარობო დელეგაციის წევრებმა მასპინძლებს საკუთარი გამოცდილება გაუზიარეს.

„ დღევანდელი შეხვედრა ჩვენი რეგიონისთვის მნიშვნელოვანია.შეხვედრაზე განსაკუთრებული ყურადღება აგრო და ტურიზმის განვითარებას დაეთმო, რაც რეგიონისთვის მნიშვნელოვანია“. –ამბობს, ახალციხის მუნიციპალიტეტის გამგებელის პირველი მოადგილე გურამ მელიქიძე.

იაპონიის საერთაშორისო თანამშრომლობის სააგენტოს მიერ საქართველოს მთავრობასთან თანამშრომლობის შედეგად შემუშავებულია "რეგიონული განვითარების პროგრამა". აღნიშნული პროგრამის ფარგლებში, დაგეგმილია სხვადასხვა მასშტაბური პროექტების განხორციელება, რაც ხელს შეუწყობს რეგიონებში ეკონომიკურ ზრდასა და განვითარებას.

შეხვედრაზე მხარეებმა განიხილეს კონკრეტულად სამცხე-ჯავახეთის რეგიონში სოფლის მეურნეობისა და ტურიზმის განვითარების პერსპექტივები. აღინიშნა, რომ იაპონიის საერთაშორისო თანამშრომლობის სააგენტო დაინტერესებულია მხარეში სოფლის მეურნეობისა და ტურიზმის, მათ შორის ეკოტურიზმის განვითარებით და მზად არის ხელი შეუწყოს ორ ქვეყანას შორის თანამშრომლობას ამ მიმართულებით.

"რეგიონული განვითარების პროგრამა" იაპონიის საერთაშორისო თანამშრომლობის სააგენტოსა და საქართველოს სოფლის მეურნეობის სამინისტროს ერთობლივი ინიციატივით ხორციელდება. სამომავლოდ შეიქმნება სამუშაო ჯგუფი, რომელიც გაემგზავრება იაპონიაში და ადგილზე გაეცნობა იაპონურ მიღწევებს სხვადასხვა მიმართულებით.


5 კაციანი დელეგაცია სამცხე–ჯავახეთს გუშინ, 23 ივლისს ეწვია. სტუმრები ბორჯომის მუნიციპალიტეტის დაბა წაღვერში იმყოფებოდნენ. დღეს კი ახალციხელ ფერმერებს შეხვდნენ და ურაველში ყველის საწარმო „წიფორა სამცხე“ მოინახულეს.

[ვარლამ წიკლაური, ახალციხე]