სამცხე – ჯავახეთის დელეგაცია არტაანის გუბერნიას ესტუმრა

სამცხე – ჯავახეთის გუბერნატორმა აკაკი მაჭუტაძემ და არტაანის გუბერნატორმა ახმედ დენიზმა განიხილეს სასაზღვრო რეგიონებს შორის სავაჭრო-ეკონომიკური ურთიერთობების, კულტურის, განათლებისა და სხვა სფეროებში აქტიური თანამშრომლობის პერსპექტივები.

განსაკუთრებული აქცენტები გაკეთდა ტურიზმისა და ტურისტული პოტენციალის განვითარებაზე და ამ მხრივ ერთობლივი პროექტების განხორციელებაზე.

შეხვედრები გაიმართა ასევე, ქალაქ არტაანის მერთან, ფოსოფის გამგებელთან, არტაანის სავაჭრო-სამრეწველო პალატის თავმჯდომარესთან და სხვა ოფიციალურ პირებთან.

ქართული დელეგაციის შემადგენლობაში იყვნენ გუბერნატორის მოადგილე ავთანდილ კაჭკაჭაშვილი, ქალაქ ახალციხის მერი გიორგი კოპაძე, ახალციხის მუნიციპალიტეტის გამგებელი ზაზა მელიქიძე და გუბერნატორის ადმინისტრაციის რეგიონული პროექტების მართვის სამსახურის უფროსი მარინა გაჩეჩილაძე.

დელეგაციის წევრები გაეცნენ მეზობელ რეგიონში ადგილობრივი მმართველობის ორგანოების მუშაობის სპეციფიკას, მიმდინარე ინფრასტრუქტურულ პროექტებსა და ტურიზმის განვითარებისათვის განხორციელებულ სამუშაოებს.

ტრადიციულად საპასუხო ვიზიტით უახლოეს ხანში სამცხე-ჯავახეთს არტაანის მხარის დელეგაცია ეწვევა. ახალციხის მერმა გია კოპაძემ მასპინძლები 30 ივნისს შალვა ახალციხელის დღისადმი მიძღვნილ ღონისძიებაზე მოიწვია. მორიგი მიწვევა მიიღო სამცხე-ჯავახეთის მხარემაც. 8-10 აგვისტოს არტაანში ტრადიციად ქცეულ თაფლის ფესტივალზე. გამოითქვა სურვილი ერთობლივი სპორტული ღონისძიებების ჩატარების შესახებაც.

ვიზიტის ფარგლებში სტუმრებს არდაგანის უნივერსიტეტშიც უმასპინძლეს და იქ არსებული სამეცნიერო-საგანმანათლებლო რესურსები და პროგრამები გააცნეს, მოინახულეს არტაანის გუბერნიაში მშენებარე სამთო-სათხილამურო ბაზა, დღის ბოლოს კი მხარის ღირსშესანიშნაობები - ისტორიული მუზეუმი და არტაანის ციხე დაათვალიერეს.



[Sknews.ge]