ერთი წლის დაკარგვა, უფასოდ სწავლის სანაცვლოდ

სტუდენტი ნანა აჩელაშივილი ინგლისურ ფილოლოგიაზე სწავლობს და წელიწადში 1750 ლარს იხდის: „ახლა გავიგე, რომ მომდევნო სასწავლო წლიდან ქართულ ფილოლოგიაზე სწავლა უფასო ხდება. ეს ჩემი ოჯახისთივის ხელსაყრელია, რადგან ოჯახიდან ორი სტუდენტი ვართ და რთულია გადასახადის გადახდა. გვირჩევნია ერთი წელი დავკარგოთ და მომდევნო წლიდან უფასოდ ვისწავლოთ მე და ჩემმა დამ".

ქრთული ფილოლოგიის მიმართულების პირველი კურსის 17 სტუდენტიდან 10 ხელმეორედ გადის ერთიან ეროვნულ გამოცდებზე.

„შარშან, როცა ვაბარებდი, ვიცოდი, რომ თითქოს უფასო უნდა ყოფილიყო, თუმცა ასე არ მოხდა და წელს მინდა ისევ ჩავაბარო და იმ ფულით, რაც გადასახადში უნდა გადამეხადა, მირჩევნია რაიმე შევიძინო,“ – ამბობს სტუდენტი თეონა ზაქროშვილი.

ახალციხის საგამოცდო ცენტრში 35 სტუდენტი დარეგისტრირდა გრანტის გასაუმჯობესებელ გამოცდაზე, თუმცა საბოლოოდ საგამოცდო ბარათი ოთხმა სტუდენტმა აღარ აიღო.

შეკითხვაზე, რატომ აბარებს გრანტის გასაუმჯობესებელ გამოცდას, მარიამ ნარიმანიძე გვპასუხობს: „უკვე მესამე კურსის სტუდენტი ვარ და საგრანტოზე გასვლა წელს ვცადე. ველოდები შედეგებს და იმედია მიზანს მივაღწევ“.

უნივერსიტეტში განმარტავენ, რომ 2015 წლის ერთიან ეროვნულ გამოცდებზე სამცხე–ჯავახეთის სახელმწიფო უნივერსიტეტი პირველ პრიორიტეტად 484 აბიტურიენტს აქვს დასახელებული, მეორე პრიორიტეტად 405.

[თეონა თაბუნიძე, ახალციხე]