სამცხე–ჯავახეთის უნივერსიტეტში ‘ეტალონი სტუდენტი’ გამოვლინდა

ეტალონს უნივერსიტეტმა 31 მარტს უმასპინძლა. სტატუსის მოსაპოვებლად გამართულ ინტელექტუალურ ბრძოლაში უნივერსიტეტის ოთხივე ფაკულტეტიდან 46 სტუდენტი ჩაერთო.

მონაწილეების სიმრავლის „ეტალონი„ ორ ტურად ჩატარდა. თითოეული ტურიდან შერჩული მონაწილეები ერთმანეთს ფინალში დაუპირისპირდნენ.

გამარჯვებული იურიდიული ფაკულტეტის მესამე კურსის სტუდენტი ლაშა ზაზაძე გახდა. ლაშა წარადგენს სამცხე–ჯავახეთის უნივერსიტეტს თბილისში, საქართველოს „ეტალონი სტუდენტის“ გამოსავლენ ტურზე. უკვე ცნობილია, რომ ფინალური ეტალონი 14 მაისს, სპორტის სასახლეში ჩატარდება.



„ეტალონი სტუდენტის“ შესარჩევ ღონისძიებას, რომელიც უნივერსიტეტის დარბაზში ჩატარდა, სასწავლებლის ხელმძღვანელობა, პროფესორ – მასწავლებლები და სტუდენტები ესწრებოდნენ.

"შემთხვევით არაფერი ხდება, დღეს იყო სიმბოლური დღე, 31 მარტი. სიმბოლური იმიტომ, რომ წლების წინ ამ დღეს საქართველოს მოსახლეობამ მხარი დაუჭირა საქართველოს დამოუკიდებლობასა და თავისუფლებას. ვფიქრობ, დღეს სამცხე-ჯავახეთის სახელმწიფო უნივერსიტეტის სტუდენტებმა თავიანთი ცოდნის დემონსტრირებით დაამტკიცეს, რომ საქართველოს მომავალი მისი დამოუკიდებლობა და თავისუფლებაა“, – განაცხადა სამცხე-ჯავახეთის სახელმწიფო უნივერსიტეტის პრორექტორმა მაკა კაჭკაჭიშვილმა.

ღონისძიების დასასრულს, ეტალონის ყველა მონაწილეს სერტიფიკატი გადაეცა. თავად პროექტის ავტორსა და წამყვანს, გოჩა ტყეშელაშვილს კი, უნივერსიტეტისგან საჩუქრად რექტორის, მერაბ ბერიძის წიგნები „სიყვარულის უნივერსიტეტი“ და „მომავლის უნივერსიტეტი“გადაეცა.



[სოფო ღვინიაშვილი, ახალციხე]