მერიამ ‘ახალციხის ტბა’ გაგა ღავთაძეს ჩააბარა

ამ პოზიციაზე დანიშვნამდე გაგა ღავთაძე ნავთობისა და გაზის კომპანიაში ზედამხედველად მუშაობდა.
„თავისი კეთილსინდისიერებით, გულისხმიერებით, მონდომებულობითა და ყველანაირი გამოცდილებით, რაც სჭირდებოდა ააიპ–ს, ისეთი ადამიანი შევარჩიეთ და დავნიშნეთ“, – ამბობს ახალციხის მერის მოადგილე ზაზა გელაძე.

ახალციხის მერიაში განმარტავენ, რომ ააიპ–ის ბიუჯეტი ჯერ დამტკიცებული არ არის. გაგა ღავთაძე ამბობს, რომ ბიუჯეტის დამტკიცების შემდეგ ტბაზე გასართობი საშუალებების მოწყობა იგეგმება.

„ძირითადად იქნება გასართობი კომპლექსი, როგორც მოზრდილებისთვის ასევე ბავშვებისთვის, იქნება ველოსიპედები, ნავები“, – ამბობს ღავთაძე და ამატებს, რომ ბიუჯეტი საკრებულოს უახლოეს სხდომაზე დამტკიცდება.

მისივე თქმით, ნაწილი სამუშაოებისა ზაფხულის სეზონზე მოესწრება, ნაწილი კი მომავალ სეზონზე გადაიწევს.

[თამარ თოთაძე, ახალციხე]