ახალციხის ტბა სეზონის ბოლოს – დაპირებები და შედეგი

2015 წლის ზაფხული ისე დასრულდა, რომ ახალციხის ხელოვნურ ტბაზე შადრევნები არ ამუშავებულა, მხოლოდ გარე განათება ჩაირთო და ტბაში წყალი შეუშვეს. ახალციხის მერის დაპირების მიუხედავად, ჯერ ტბაზე არც სანაპირო მოუწყვიათ და არც წყლის ველოსიპედები ჩანს სადმე.

„ტბის წყალი ქვეწარმავლებისგან გავწმინდეთ, მალე ფანტანებიც გაკეთდება“, – ირწმუნება ააიპ „ახალციხის ტბის“ დირექტორი გაგა ღავთაძე.

გასართობი კომპლექსი ახალციხის ხელოვნური ტბა მერიამ არასამეწარმეო (არაკომერციულ) იურიდიულ პირად მიმდინარე წლის ივლისში დაარეგისტრირა. მალევე დამტკიცდა ტბის ბიუჯეტიც.

„ერთიანი დემოკრატიული მოძრაობის“ სამცხე–ჯავახეთის კოორდინატორი ჯიმშერ გოგოლაური ფიქრობს, რომ ტბისთვის გამოყოფილი ფული არამიზნობრივად იხარჯება.

„ტბაზე ააიპ–ი მერიამ ნათესავების დასასაქმებლად შექმნა. მერი თავის ხალხს ასაქმებს, ეს ფული სად მიაქვს არავინ იცის“, – ამბობს ჯიმშერ გოგოლაური, თუმცა, უცნობია რაში ხედავს ნეპოტიზმის ნიშნებს, რადგან ტბის ადმინისტრაციაში ირწმუნებიან, რომ ჯერ მხოლოდ დირექტორი და მისი მოადგილე არიან დანიშნული.

ჯიმშერ გოგოლაურის თქმით, ახალციხის მერის განცხადების თანახმად, ტბაზე სარეაბილიტაციო სამუშაოები აგვისტოს ბოლოს უნდა დასრულებულიყო. ამის შესახებ რამდენიმე დღის წინ გამართულ საკრებულოს სხდომაზეც იმსჯელეს: „არც წყალი, არც თევზი, არც ნავები. კოპაძე სულ იმას ამბობდა, აგვისტოში დასრულდება სამუშაოებიო, მაგრამ რა გაკეთდა?“

მიმდინარე წლის ზაფხულის სეზონი რომ ჩავარდა, ამას „ერთიანი ნაციონალური მოძრაობის“ ახალციხის რაიონული ორგანიზაციის თავმჯდომარე გელა დემეტრაძეც ფიქრობს: „ბევრი ხალხი იკრიბება ტბაზე საღამოობით, ბევრი რამის გაკეთება შეიძლებოდა, თუმცა, არაფერი გაკეთებულა“.

რატომ გაჭიანურდა ტბაზე დაგეგმილი სამუშაოები ახალციხის მერიაში ვერ გავარკვიეთ, პრესსამსახურმა ინფორმაციის მისაღებად ტბის დირექტორთან გადაგვამისამართა. თუმცა, პასუხი ვერც ერთი თვის წინ დანიშნულმა დირექტორმა გაგვცა.

„ვერაფერს გეტყვით“, – განაცხადა გაგა ღავთაძემ.

[ვარლამ წიკლაური, ახალციხე]