ახალციხეში „ივლიტას ბიბლიოთეკისთვის“ წიგნებს აგროვებენ

ივლიტა ჯიბუტის სახელობის ბიბლიოთეკა, მის მშობლიურ რაიონში 19 ივლისს, ივლიტას დაბადების დღეს გაიხსნება. ბიბლიოთეკის გახსნის ინიციატორები არიან მედიასახლი „გურიანიუსი“ და პარლამენტის ეროვნული ბიბლიოთეკის გენერალური დირექტორი გიორგი კეკელიძე.

გოგონა ერთ–ერთია მათ შორის, ვინც თბილისში, 13 ივნისის სტიქიის შედეგად დაიღუპა.

როგორც ახალციხის მუნიციპალიტეტის მერიაში განმარტავენ, ამ დროისთვის მოქალაქეთა აქტიურობა არ შეინიშნება. ბიბლიოთეკისთვის გადასაცემი წიგნები მხოლოდ მერმა და თანამშრომლებმა შეიძინეს.

წიგნები ეტაპობრივად გაიგზავნება და მსურველებს ნებისმიერ დროს შეუძლიათ მიიტანონ ახალციხის მერიაში. წიგნების ჟანრს მნიშვნელობა არ აქვს.

გარდა წიგნებისა მსურველებს შეუძლიათ ბიბლიოთეკისთვის თანხის გადარიცხვაც “გურია ნიუსის“ საქველმოქმედო საბანკო ანგარიშზე: სს საქართველოს ბანკი, ბანკის კოდი: BAGAGE22; საბანკო ანგარიში – GE02BG0000000125488801.

ბიბლიოთეკისთვის ფართი ”გურია ნიუსის” ოფისში გამოიყო. შენობის ნაწილი მოხალისეებმა გაარემონტეს.

ივლიტა ჯიბუტის სახელობის ბიბლიოთეკისთვის წიგნები უკვე შეიძინეს საქართველოს პარლამენტის ეროვნული ბიბლიოთეკის თანამშრომლებმა. ბიბლიოთეკას წიგნები გადასცეს გამომცემლობებმა და კერძო პირებმა.

ივლიტა ჯიბუტის სახელობის ბიბლიოთეკაში მკითხველებს უახლესი ლიტერატურის გაცნობის, ინტერნეტის შეუზღუდავი წვდომისა და სხვადასხვა სახის შეხვედრების მოწყობის შესაძლებლობა ექნებათ.

[ნანა მიქელაძე, თეონა თაბუნიძე, ახალციხე]