აკაკი მაჭუტაძე: საკადრო ცვლილებები უმტკივნეულო იქნება

"უმტკივნეულოდ იქნება ყველაფერი, ნურავინ იღელვებს. ახალი წელი მოდის და ყველაფერი უმტკივნეულოდ ჩაივლის", - განაცხადა აკაკი მაჭუტაძემ "სამხრეთის კარიბჭესთან" სატელეფონო საუბარში.

ახალი გუბერნატორი რეგიონს რამდენიმე დღეში ესტუმრება. იგი ამბობს, რომ სამცხე-ჯავახეთს საკმაოდ კარგად იცნობს. სამომავლო გეგმებზე საუბრისგან ამ ეტაპზე იგი თავს იკავებს. თუმცა ირწმუნება, რომ რეგიონში ჩამოსვლისა და სიტუაციის გაცნობის შემდეგ, სამცხე-ჯავახეთის წინამორბედი გუბერნატორისგან განსხვავებით, მედიასთან აქტიურად ითანამშრობლებს.

შეგახსენებთ, აკაკი მაჭუტაძე სამცხე-ჯავახეთის გუბერნატორად, დღეს, 13 დეკემბერს დაინიშნა. 2012 წლის 6 ივლისიდან 2013 წლის 15 ნოემბრამდე ეს პოსტი ივანე წიკლაურს ეკავა, რომელიც მედიასთან არასოდეს გამოჩენილა.

აკაკი მაჭუტაძეს მოადგილეები არ დახვდებიან. ყოფილი რწმუნებულის მოადგილეებმა გელა დემეტრაძემ და ვახტანგ გეწაძემ გადადგომის შესახებ განცხადებები ახალი გუბერნატორის დანიშვნამდე ერთი დღით ადრე, 12 დეკემბერს დაწერეს.

„ერთიანი ნაციონალური მოძრაობის“ ახალციხის რაიონული ორგანიზაციის ხელმძღვანელმა, ყოფილი რწმუნებულის ყოფილმა მოადგილემ გელა დემეტრაძემ "სამხრეთის კარიბჭესთან" საუბარში განაცხადა, რომ ახალ გუბერნატორთან თანამშრომლობას არ აპირებს.

გადადგომის მიზეზების დასადგენად ვახტანგ გეწაძესთან დაკავშირებას "სამხრეთის კარიბჭე" მთელი დღე ცდილობდა, თუმცა უშედეგოდ. მის მიერ განცხადების დაწერა "სამხრეთის კარიბჭეს" სამხარეო ადმინისტრაციის თანამშრომლებმა დაუდასტურეს.

[ნინო ნარიმანიშვილი, ახალციხე]