შეფერხებული მოძრაობა ახალციხის ქუჩებში

ერთიანი ეროვნული გამოცდების გამო, რომელიც ახალციხის მეხუთე საჯარო სკოლაში ტარდება, 2 ივლისიდან, რუსთაველის ქუჩიდან კეცხოველისა და ნათენაძის ქუჩების მიმართულებით (ახალციხის მეხუთე სკოლიდან ცენტრალური პარკისკენ შესასვლელი) გზა იკეტება.

ავტომანქანები, რომლებიც ქალაქის ბოლოდან ცენტრისკენ მოემართებიან, უმეტესად ფარნავაზ მეფისა და პაატა ნათენაძის ქუჩებით მოძრაობენ. ამ ქუჩებზე კი ორი დღეა საცობებს დაზიანებული წყლის სისტემა ქმნის.

ისედაც შეფერხებულ მოძრაობას, სარემონტო სამუშაოების გამო შევიწროებული გზაც ემატება.

„საქართველოს გაერთიანებული წყალმომარაგების კომპანიაში“ ირწმუნებიან, რომ სარემონტო სამუშაოები დროულად მოგვარდება.
„გუშინ ვიყავი და მოვინახულე. წყლის სისტემაა დაზიანებული, მეორე დღეა ვმუშაობთ. წესით დღეს უნდა მოვრჩეთ“, – ამბობს „საქართველოს გაერთიანებული წყალმომარაგების კომპანიის“ სამცხე–ჯავახეთის სერვისცენტრის მენეჯერი გიორგი ბაგინაშვილი.

[ვარლამ წიკლაური, ახალციხე]