რატომ იტბორება დილიდან კოსტავას ქუჩა

კოსტავას ქუჩიდან წყლის ნაკადი მეხუთე საჯარო სკოლის მიმდებარე ტერიტორიაზე, კეცხოველისა და რუსთაველის ქუჩებზე ჩადის და რუსთაველის ქუჩის სანიაღვრე არხში ჩაედინება.

კოსტავას ქუჩაზე მცხოვრები ხათუნა ბოჭორიშვილი ამბობს, რომ წყალმა ქუჩაზე მას მერე ამოხეთქა, რაც წყალმომარაგების კომპანიის თანამშრომლებმა აქ გათხრები დაიწყეს.
„ჩვენთან სასმელი წყალი არ შეფერხებულა, რა მიზეზით დაიწყეს გათხრა, ვერ გეტყვით, შესაძლოა რომელიმე ქუჩას არ მიეწოდება და ამიტომ მუშაობენ“, - ამბობს იგი.

„საქართველოს გაერთიანებული წყალმომარაგების კომპანიის“ ახალციხის სერვისცენტრის მენეჯერი გია დალალიშვილი განმარტავს, რომ სამუშაოები ძველი მილის დაზიანების გამო დაიწყეს: „მილი რამდენიმე ადგილას ჩავჭერით. გვინდა მთლიანად ჩამოვაჭრათ ცენტრალურ მაგისტრალს“.

ამ დროისთვის სამუშაოები შეჩერებულია. სერვისცენტრის თანამშრომლების თქმით, ცენტრალური მილიდან წყლის დაწრეტვას ელოდებიან. სამუშაოები დღის ბოლომდე დასრულდება.



[თინათინ ზაზაძე, ახალციხე]