ახალციხის უნივერსიტეტში წიგნების გამოფენა მოეწყო

გამოფენა უნივერსიტეტის ორივე კორპუსის სამეცნიერო ბიბლიოთეკაში მოეწყო.

- ”საიუბილეო და მინიატურული წიგნები გამოვფინეთ. ეს წიგნები საცავში გვქონდა. გვინდა სტუდენტებმა გაიცნონ უნივერსიტეტში არსებული წიგნები”,- ამბობს უნივერსიტეტის სამეცნიერო ბიბლიოთეკის ხელმძღვანელი ხათუნა კვინცხაძე.

წიგნის საერთაშორისო დღე მსოფლიოში 1923 წლიდან აღინიშნება. ამავე წელს კატალონიაში კაცები ქალებს ვარდებს ჩუქნიდნენ და მათგან წიგნებს იღებდნენ საჩუქრად. 1616 წლის 23 აპრილს სერვანტესის გარდაცვალების დღეს დაამთხვიეს.

მოგვიანებით, 1995 წელს 23 აპრილი ”იუნესკომ” წიგნის საერთაშორის დღედ ოფიციალურად გამოაცხადა. ”იუნესკოს” რეზოლუციაში ნათქვამია: ”ვინაიდან წიგნი კაცობრიობის ისტორიაში ცოდნის გავრცელებისა და დაცვის ყველაზე მნიშვნელოვანი ფაქტორია, 23 აპრილი ყოველწლიურად წიგნისა და საავტორო უფლებების დღედ ცხადდება”.

[ნინო ზედგინიძე, ახალციხე]