ივანე ახალციხელის ქუჩაზე ჯერ გზას დააგებენ, შემდეგ საკანალიზაციო ქსელს მოაწყობენ

ქალაქ ახალციხის მუნიციპალიტეტის მერიამ ივანე ახალციხელის ქუჩაზე გზის რეაბილიტაცია დაიწყო. მერის მოადგილის ზაზა გელაძის განმარტებით, ამ დასახლებაში პირველ ეტაპზე გზის საფარი დაახლოებით 850–900 მეტრამდე დაიგება. სამუშაოებს ტენდერში გამარჯვებული შპს "ასტორია" ასრულებს და აღნიშნული პროექტისთვის რეგიონში განსახორციელებელი პროექტების ფონდიდან 400 ათასი ლარია გამოყოფილი. წელს ამ დასახლებაში საკანალიზაციო სისტემის მოწესრიგებაც იგეგმება, თუმცა აღნიშნული სამუშაოები ჯერ დაწყებული არ არის.

"ეს პირველი ფენა თავიდან ბოლომდე დაიგება, მაგრამ მეორე ფენას არ დავიწყებთ, რადგან საკანალიზაციო სისტემა უნდა მოწესრიგდეს, გაკეთდეს არხები. ჩვენ უკვე გვაცნობეს, რომ ამ პრობლემას მოაგვარებენ და მეორე ეტაპი დაიწყება უკვე, როცა კანალიზაცია გაკეთდება", – ამბობს ზაზა გელაძე.

მისივე თქმით, თუ საკანალიზაციო სისტემის მოწესრიგების დროს აუცილებელი გახდება, რომ უკვე დაგებული ასფალტი გადაითხაროს, კომპანია ვალდებული იქნება ასფალტი პირვანდელი სახით აღადგინოს.

ამ ეტაპზე დასახლებაში მხოლოდ სოფლამდე დამაკავშირებელი გზის რეაბილიტაცია მიმდინარეობს. ზაზა გელაძის თქმით, დანარჩენ ჩიხებში გზის რეაბილიტაცია სამომავლოდ იგეგმება.

"აუცილებლად გაკეთდება სამომავლოდ, მთლიანი პროექტისთვის თანხა 850 ათასი იყო საჭირო, ამ ეტაპზე მხოლოდ 400 ათასის სამუშაოები სრულდება. ის დანარჩენი 2016 წელს გაკეთდება, როცა მოწესრიგდება შიდა და გარე კანალიზაცია", – ამბობს ზაზა გელაძე.

კონკრეტულად როდის დაიწყება ამ დასახლებაში საკანალიზაციო სისტემის მოწესრიგება, ახალციხის მერიაში ინფორმაცია არ აქვთ.

შეგახსენებთ, რომ ივანე ახალციხელის ქუჩაზე მცხოვრებლებმა ზუსტად ერთი კვირის წინ აქცია მოაწყეს. მათ ახალციხის მერიასა და გაერთიანებული წყალმომარაგების კომპანიას მიმართეს. ამავე სამსახურებს ისევ ამავე ქუჩაზე, ოღონ ჩიხებში მცხოვრებმა მოსახლეობამ მიაკითხა დღესაც. როგორც ახალციხის მერიასა და საქართველოს გაერთიანებული წყალმომარაგების კომპანიის სამცხე–ჯავახეთის რეგიონულ ფილიალში ადგილობრივებს განუმარტეს, საკანალიზაციო სისტემის მოწესრიგება მალე დაიწყება.

[თამარ თოთაძე, ახალციხე]