„ახალციხის ციხემდე“ მისასვლელი გზა ამორტიზებულია

ახალციხის მუნიციპალიტეტის სოფელ ივლიტას გავლით „ახალციხის ციხემდე“ მისასვლელი გზის მდგომარეობა, განსაკუთრებით, მიმდინარე წლის 19 ივნისის წვიმის შემდეგ გაუარესდა. გზის ეს მონაკვეთი ბოლოს, ციხის რეაბილიტაციის დროს, 2012 წელს მოიხრეშა და მას შემდეგ სარემონტო სამუშაოები აღარ ჩატარებია.

„ორ კვირაზე მეტია რაც წყალი მოვარდა და გზა გააფუჭა, აქ ტურისტები დადიან და ავტობუსით სიარული უჭირთ“, – ამბობს ივლიტაში მცხოვრები ჯუმბერ აღლემაშვილი.

ივლიტის გზა, 2 ივლისს, „ერთიანი ნაციონალური“ მოძრაობის წარმომადგენლებმა დაათვალიერეს. ახალციხის მუნიციპალიტეტის საკრებულოს ყოფილი თავმჯდომარე და ქალაქის საკრებულოს დეპუტატი „ნაციონალური მოძრაობიდან“ მალხაზ გიქოშვილი ამბობს, რომ ამ გზის მოხრეშვას 10 მანქანა ხრეში ეყოფა: „ყველა ტურისტი ამ გზით დადის, ეს გზა სპეციალურად ტურისტებისთვის გაკეთდა, მაგრამ მესამე წელია მისთვის არავის მიუხედავს და ასე იმიტომ გაფუჭდა“.

ახალციხის მუნიციპალიტეტის გამგებლის ზაზა მელიქიძის თქმით, სოფელ ივლიტასთან დამაკავშირებელი გზა სოფლის მხარდაჭერის პროგრამის ფარგლებში კეთდება და პროექტზე მუშაობა უკვე დაწყებულია.

„სოფლის მხარდაჭერის პროგრამის ფარგლებში გამოყოფილი თანხა ამ პროექტის შესრულებას არ წვდება, ამიტომ მუნიციპალიტეტის გადაწყვეტილებით, თანხა ადგილობრივი ბიუჯეტიდან დაემატება და გზის გარდა სოფელში ამ თანხით ხიდის გაფართოებაც იგეგმება. ასევე, გაკეთდება ბეტონის ჯებირები და გაიწმინდება სანიაღვრე არხები“, – აცხადებს მელიქიძე.

მისი თქმით, სოფელში სამშენებლო სამუშაობი ივლისის ბოლოს დაიწყება.





[ვარლამ წიკლაური, ახალციხე]