ახალციხის მერია დაპირებული გზის მოხრეშვაზე: ‘არ ვიცით წელს გაკეთდება თუ არა’

ახალციხის მერი ზაზა მელიქიძე აცხადებდა, რომ ელიაწმინდაში სასაფლაომდე მისასვლელი გზა იმ პროექტის ფარგლებში მოიხრეშებოდა, რომლითაც ჭვინთა–ელიაწმინდის შიდა ქუჩების რეაბილიტაცია მიმდინარეობდა, თუმცა მშენებელმა კომპანიამ სამუშაოები ისე დაამთავრა და სოფლებიც დატოვა, რომ გზა მოუხრეშავი დარჩა.

ახლა კი ახალციხის მერიაში ამბობენ, რომ სოფლების შიდა ქუჩების მოხრეშვის პროექტში სასაფლაომდე მისასვლელი გზა ჩასმული არ იყო, მაგრამ ეს მონაკვეთი აუცილებლად გაკეთდება: „ან ტენდერს გამოვაცხადებთ, ან გზების მოვლაპატრონობაზე პასუხისმგებელი კომპანია მოხრეშავს. ჯერ გადაწყვეტილი არაა ვინ გააკეთებს და არც ის ვიცით წელს მოიხრეშება თუ მომავალ წელს“.

შეგახსენებთ, რომ სოფელ ელიაწმინდაში, გზის 300–მეტრიანი ავარიული მონაკვეთი, სოფლის ნაწილს სასაფლაოებთან, ხუთ კომლს კი საცხოვრებელ სახლებთან აკავშირებს. ადგილობრივები ახალციხის მერიას გზის მოხრეშვას ერთი თვის წინ სთხოვდნენ.

[ლუბა გიორგაძე, ახალციხე]