წვიმის იმედად დარჩენილი კლდის მოსახლეობა

8 წლის წინ გაყვანილი სარწყავი არხები, სოფელ კლდის მიმდებარე, ეგრეთ წოდებულ ჭალების ტერიტორიაზე ამორტიზებულია. ადგილობრივები ამბობენ, რომ ახლა, როცა ძალიან დაცხა და რწყვის სეზონიც დაიწყო, იძულებული არიან საქაჩი შეიძინონ და ნათესების მოსარწყავად წყალი მტკვრიდან ამოქაჩონ .

„არხები გაფუჭებულია, არავინ არ ფიქრობს ამაზე. არავის გაუწმენდია ჩასილული მილები. წვიმის იმედად ვართ. ვისაც საშუალება ჰქონდა, წყლის საქაჩები იყიდა და ისე რწყავენ ნათესებს“, – ამბობს ალექსანდრე მელქონიანი.

კლდეში მცხოვრებლებს დღეს „ერთიანი ნაციონალური მოძრაობის“ წარმომადგენლები შეხვდნენ.

„8 წლის წინ, გაკეთდა სარწყავი არხები, თუმცა დღეს სათავე ნაგეგობა მთლიანად შესაცვლელია, მილებიც გასაწმენდია“, – ამბობს „ერთიანი ნაციონალური მოძრაობის“ სამცხე–ჯავახეთის კოორდინატორი, ახალციხის მუნიციპალიტეტის ყოფილი გამგებელი გელა დემეტრაძე.

მისივე თქმით, ამ საკითხთან დაკავშირებით მიმდინარე წლის თებერვალში საკრებულოს მიმართა, თუმცა უშედეგოდ: „თუ დროულად არ მოგვარდება ეს პრობლემა, მოსახლეობას ნათესები გაუნადგურდება“.

ახალციხის მუნიციპალიტეტის საკრებულოს თავჯდომარის მოადგილე გელა ნოზაძე ამბობს, რომ საკუთარ ნაკვეთზე გასულ წელს არხების გასაწმენდად 300 ლარი დახარჯა.

„სოფლის ექსკავატორი არხებს ვერ გაწმენდს, სხვა უნდა ვიქირავოთ. ამ ეტაპზე იმის საშიშროება, რომ გაწმენდის შემდეგ არხებში წყალმა ვერ შეძლოს გავლა, არ არსებობს. ეს პრობლემა მოგვარდება“, – ირწმუნება გელა ნოზაძე.



[ვარლამ წიკლაური, ახალციხე]