ახალციხის გამგეობა ღვარცოფებისგან დაზიანებული გზების შეკეთებას იწყებს

ღვარცოფის შედეგად დაზიანებული საუბნო გზა აწყურში. ფოტო გადაღებულია 12 ივნისს

რამდენჯერმე მოსულმა ძლიერმა წვიმამ და სეტყვამ ახალციხის მუნიციპალიტეტის არაერთი სოფელი დააზარალა, როგორც ინფრასტრუქტურის, ისე სასოფლო – სამეურნეო სავარგულების კუთხით.

სტიქიამ განსაკუთრებით სოფელი აწყური დააზარალა. როგორც გამგეობაში განმარტავენ, აწყურში გზების ნაწილი უკვე გაწმენდილი და მოწესრიგებულია, თუმცა, როგორც აწყურში ისე სხვა სოფლებში, ჯერ კიდევ დარჩენილია მონაკვეთები, სადაც სერიოზული სამუშაოებია ჩასატარებელი.

„აწყურში ოპერატიულად გაიწმინდა და შეკეთდა გზები, თუმცა ეს არ არის საკმარისი. სტიქიამ თითქმის ყველა სოფლის გზა დააზიანა“, – ამბობს ახალციხის მუნიციპალიტეტის გამგებელი ზაზა მელიქიძე.

ახალციხის გამგეობამ დაზიანებული გზების შესაკეთებლად ადგილობრივი ბიუჯეტიდან 50 ათასი ლარი გამოყო. როგორც ზაზა მელიქიძე ამბობს, ეს არის სავარაუდო თანხა. გამგეობა მზად არის საჭიროების შემთხვევაში თანხა დამატებით გამოყოს.

„მუნიციპალიტეტმა გაითვალისწინა თბილისში მომხდარი სტიქია.გადავწყვიტეთ, რომ ინფრასტრუქტურული პროექტები სამინისტროში აღარ გადავაგზავნოთ და დაზიანებული გზები ჩვენი ხარჯებით გავაკეთოთ. 50 ათასი ლარი, რომელიც უკვე გამოვყეთ დაიხარჯება მხოლოდ საწვავსა და სამშენებლო მასალაში. ჩვენ გვყავს საკუთარი ტექნიკა, რაშიც თანხა აღარ დაგვეხარჯება“, – ამბობს ზაზა მელიქიძე.

მისივე თქმით, გამგეობა მოსახლოებას სოფლის მეურნეობის კუთხით მიყენებულ ზარალს ვერ აუნაზღაურებს: „გარდა ინფრასტრუქტურისა, სოფლებს მნიშვნელოვანი ზარალი მიადგა სოფლის მეურნეობის კუთხით, ძალიან გვინდა, რომ აქაც მოსახლოებას გვერდში დავუდგეთ, თუმცა საიმედოს ვერაფერს ვეტყვით“.

შეგახსენებთ, რომ 11 ივნისს სეტყვამ ახალციხის მუნიციპალიტეტის რვა სოფელი, აწყური, გიორგიწმინდა, ფერსა, მუგარეთი, კლდე, წნისი, გურკელი და წინუბანი დააზარალა. სტიქიის გამო აწყურში ცენტრალური მაგისტრალი გადაიკეტა. ძლიერმა წვიმამ გზაზე ნაშალი მიწა ჩამოიტანა, რამაც საავტომობილო მოძრაობა შეაფერხა.

დაახლოებით ერთ კვირაში, 20 ივნისს აწყური მეორედ დაისეტყვა. სოფელს ზარალი ძირითადად სოფლის მეურნეობის კუთხით მიადგა. წვიმამ წინა სტიქიის შემდეგ მოხრეშილი გზებიც დააზიანა.

[მანანა სარაშვილი, ახალციხე]