‘თვითონ თვითმფრინავით გადაფრინდნენ, ბავშვები ავტობუსით გაუშვეს’ - მერიის დაფინანსებულ გასტროლს აკრიტიკებენ

ავტობუსი, რომელიც ურაველის მიმართულებით დადის.

27 მაისიდან 2 ივნისამდე ანსამბლი „ახალციხე“ თურქეთის რესპუბლიკის ბურსის რეგიონში, ქალაქებში: ორჰანგაზში, გემილიკში, იზნიკსა და საქარიაში ქართული მუსიკისა და ფოლკლორული ცეკვის ღონისძიებებში მონაწილეობდა. ახალციხის მერიის დელეგაცია და ქორეოგრაფიული ანსამბლი "ახალციხე " თურქეთში მცხოვრებმა ქართველებმა და ქალაქის მერებმა მიიწვიეს.

ანსამბლის ტრანსპორტირებისთვის მერიამ 4600 ლარი გამოყო. მერიიდან სამი თანამშრომელი თურქეთში თვითმფრინავით გაემგზავრა, მათ შორის, მერის პირველი მოადგილე ზაზა თამარაშვილი. ერთი კი იმ ავტობუსს გაჰყვა, რომლითაც ბავშვები მგზავრობდნენ. მერიის თანამშრომლების თურქეთში თვითმფრინავით გამგზავრებას მშობლის უკმაყოფილება მოჰყვა.

ერთ–ერთი მოცეკვავის მშობელი, ჯიმშერ გოგოლაური, რომელიც ამავე დროს ახალციხის საკრებულოში უმცირესობას წარმოადგენს, ამბობს, რომ ბავშვები შეუასაბამო ავტობუსით ამგზავრეს, ისეთით, რომლიც მოკლე მარშრუტზე დადის, მაგალითად: ახალციხე–ვალეს, ურაველისა და სხვადასხვა სოფლების მიმართულებით.

„ახალციხიდან – ბურსამდე 1450 კილომეტრზე მეტია. თვითონ თვითმფრინავით გადაფრინდნენ და ბავშვები ავტობუსით გაუშვეს. ეს ტრანსპორტი მხოლოდ და მხოლოდ შიდა ქსელებში სამგზავროდაა გათვალისწინებული და არა საერთაშორისო მიმოსვლისთვის“, - ამბობს იგი და ამატებს, რომ ეს საკითხი საკრებულოს სხდომაზე რამდენჯერმე დააყენა, მაგრამ უშედეგოდ: „ყურადღება არავინ მომაქცია. მაინტერესებს, რითი არიან მერიის თანამშრომლები ამ ბავშვებზე უკეთესები, თვითონ, რომ კომფორტულად იფრინეს და ბავშვები მოუწესრიგებელი ავტობუსით გაუშვეს“.

„სამხრეთის კარიბჭესთან“ საუბარში, ანსამბლ „ახალციხეს“ წევრთა ნაწილი აცხადებს, რომ ავტობუსი ნამდვილად მოუხერხებელი იყო და ამხელა გზაზე ასეთი პატარა ავტობუსით მგზავრობა რთული იყო.

ნაწილი კი ამბობს, რომ პრობლემა არ შექმნია: „ჩემთვის ნორმალური იყო, ვისაც პრობლემა ჰქონდა, ის გელაპარაკოს“.

მერის პირველი მოადგილე, ზაზა თამარაშვილი, რომელიც დელეგაციაში მონაწილეობდა, კრიტიკას არ იზიარებს და ამბობს, რომ რეგიონში საუკეთესო ავტობუსი შეარჩიეს: „ეს იყო საუკეთესო ტრანსპორტი, მასზე უკეთესი აქ არ არის. ავტობუსი 2013 წელსაა გამოშვებული, ჰქონდა კონდინციონირება, ტელევიზორი და ყველანაირი კომფორტი“.

კითხვაზე, თავად რატომ არჩიეს გადაფრენა, გვპასუხობს: „როცა მერიის დელეგაცია ჩადის ქვეყანაში, მნიშნელობა აქვს, რა გაცვია, რითი ჩადიხარ და ასე შემდეგ“.

მისივე თქმით, თავადაც ხშირად დადიოდა გასტროლებზე ავტობუსით და არანაირი პრობლემა არ ჰქონია: „მთელი ცხოვრება ბავშვებთან ერთად ავტობუსით დავდიოდი“.

მარიკა პარუნაშვილი მერიის ოთხ თანამშრომლიდან ერთ–ერთია, რომელიც მოცეკვავეებს ავტობუსით გაჰყვა და თვითმფრინავით არ უმგზავრია. მისი თქმით, ტრანსპორტი გამართული იყო. რაც შეეხება, კომფორტულობას: „ვიღაცისთვის კომფორტული იყო, ვიღაცისთვის არა. კომფორტულობის აღქმა ყველას ერთნაირი არ აქვს“.

პროტესტს ავტობუსის გამო არ იზიარებს სამცხე-ჯავახეთის სახელმწიფო უნივერსიტეტის ანსამბლ "ახალციხის“ ხელმძღვანელი ქრისტინე მენაბდიშვილიც. მისი თქმით, გზაში პრობლემა არ შექმნიათ, ავტობუსი გამართულ მდგომარეობაში იყო.
კომპანია „ჯეოტივში“, საიდანაც ავტობუსი იქირავეს, აცხადებენ, რომ ტრანსპორტი ახალი და გამართული იყო .

„ამ სატრანსპორტო საშუალებას ხალხი ტაო–კლარჯეთში და სხვადასხვა ქვეყნებში დაყავს . თუ არ მოეწონათ, რატომ ჩასხდნენ და რატომ წავიდნენ? ბავშვებს თუ სწრაფი კვება უნდოდათ, ავტობუსში ეგ არ იქნებოდა“, – ამბობს „ჯეოტივის“ თანამშრომელი მამუკა მამუკაშვილი და ამატებს, რომ სანამ სატრანსპორტო საშუალებას წაიყვანდნენ, მერიის თანამშრომლებმა ავტობუსი მთლიანად შეამოწმეს.


დელეგაცია თურქეთში. უკან ფონზე ჩანს ის ავტობუსიც, რომლითაც იმგზავრეს. "სამხრეთის კარიბჭემ" ავტობუსის გადაღება ვერ მოახერხა, ანსამბლის წევრებმა გვითხრეს, რომ ავტობუსთან ფოტო არ აქვთ. სატრანსპორტო კომპანიაში კი გვითხრეს, რომ ტრანსპორტი გასულია და ხვალ დილამდე კომპანიაში არ დაბრუნდება.

[ვარლამ წიკლაური, ახალციხე]