მოსახლეობის პროტესტის შემდეგ უდეს მიმართულებით ახალი ავტობუსი ივლის

ადიგენის მუნიციპალიტეტის სოფლების უდესა და არლის მოსახლეობა მოძველებული ტრანსპორტის გამო უკმაყოფილებას გამოთქვამდა. ადგილობრივები ამბობდნენ, რომ სივიწროვის გამო ტრანსპორტში ბარგი ვერ აჰქონდათ, გარდა ამისა იყო მძიმე სუნი და ანტისანიტარია.

შპს „ჯეო ტივის“ ხელმძღვანელი ნუგზარ მამუკაშვილი ამბობს, რომ მოსახლეობის აზრი გაითვალწინა და ახალციხე–უდეს ხაზისთვის ახალი, კომფორტული ავტობუსი შეიძინა.

ახალი ავტობუსით მოსახლეობა უკვე ერთი კვირაა მგზავრობს.

„ფარეხაში ვცხოვრობ და ახალციხეში ხშირად დავდივარ. მიხარია ასეთი კომფორტული ავტობუსი რომ გვემსახურება. მაღალი ვარ და მარშუტკაში ფეხზე დგომა ძალიან მიჭირდა. აქ ბარგიც თავისუფლად ამომაქვს“, – ამბობს როზა დალაგონიანი.

დალაგონიანს ეთანხმება ახალციხეში მცხოვრები ლალი აბულაძეც: „პირველად ვზივარ ახალ ავტობუსში. ძალიან კარგია. სოფლისთვის ასეთი ტევადობის ტრანსპორტი აუცილებელია. უდე ჩემი სოფელია და ხშირად მიწევს მგზავრობა“.

ავტობუსი ახალციხიდან უდეს მიმართულებით დღეში სამჯერ გადის. პირველი გასვლა ახალციხიდან 13:00 საათზე აქვს. ნუგზარ მამუკაშვილი ამბობს, რომ მოსახლეობის ნაწილი უკმაყოფილოა და უნდათ, რომ ავტობუსი სოფელ უდიდან დილის საათებში გამოვიდეს, რადგან სოფლიდან უფრო მეტი ბარგი მოაქვთ.

„სამწუხაროდ ეს შეუძლებელია. დილის რეისებს შპს „ადიგენის სატრანსპორტო საწარმო“ ასრულებს. გამოდის მე უნდა დავუპირისპირდე ამ კომპანიას. თუ ხაზსს დათმობს მოვემსახურები, მიუხედავად იმისა, რომ აქედან ცარიელი მომიწევს წასვლა და ჩემთვის ზარალია“, – ამბობს ნუგზარ მამუკაშვილი.

გეგმავს თუ არა ახალი ავტობუსის შეძენას, ან მისი კუთვნილი მარშრუტის „ჯეო–ტივისთვის“ დათმობას შპს „ადიგენის სატრანსპორტო საწარმოს“ ხელმძღვანელი გიორგი ძაძამია, უცნობია. „სამხრეთის კარიბჭე“ მასთან დაკავშირებას ორი დღეა უშედეგოდ ცდილობს.

[თინათინ ზაზაძე, ახალციხე]