საბერძნეთში ახალციხელი მოცეკვავე დაშავდა

შემთხვევა, საბრძნეთის ქალაქ ალექსანდროპულოში, გუშინ მოხდა. ამ წუთებში ”მესხეთის” მოცეკვავეს ოპერაცია უტარდება.

10 წლის ბიჭს ის ავტობუსი დაეჯახა, რომლითაც ”მესხეთი” ინგლისში, უელსში ფესტივალზე იყო. შემთხვევა, სწორედ იქიდან სამშობლოში დაბურნებისას, საბერძნეთი-თურქეთის საზღვრიდან 40 კილომეტრში მოხდა.

”ბავშვი თასმას იკრავდა, ამასობაში პოლიციამ მძღოლს დაუძახა ავობუსი გაეყვანა, მძღოლმა ბავშვი ვერ დაინახა და ფეხზე გადაუარა”, - გვიამბობს ”მესხეთის” მუსიკოსი ტარიელ ქიმერიძე და ამატებს, რომ ბავშვს ფეხი შეუნარჩუნდა.

მისივე თქმით, მოცეკვავის მშობლები უკვე ჩაფრინდნენ საბერძნეთში.

23 ბავშვისგან შემდგარი ანსამბლი ინგლისში 27 ივნისს გაემგზავრა და უკან 17 ივლისისთვის უნდა დაბრუნებულიყო. შემთხვევის გამო ანსამბლი ახალციხეში შესაძლოა ერთი დღის დაგვიანებით დაბრუნდეს.

ამ დროისთვის ანსამბლის ყველა მონაწილე საბერძნეთი-თურქეთის საზღვართანაა და საქართველოსკენ მოემგზავრება. საბერძნეთში რჩებიან ანსამბლის ხელმძღვანელი მარინა ნასყიდაშვილი და ავტობუსის მძღოლი.

ანსამბლის მონაწილეების განმარტებით, ამჟამად მძღოლიც და ნასყიდაშვილიც პოლიციაში დაკითხვაზე არიან.

პ.ს. ბავშვის უფლებებიდან გამომდინარე, ”სამხრეთის კარიბჭე” მოცეკვავის ვინაობას არ ამჟღავნებს. დაინტერესებული პირები დეტალური ინფორმაციისთვის დაგვიკავშირდით ტელეფონზე: 8 365 22 07 80.

[თამუნა უჩიძე, ახალციხე]