ასპინძის მუნიციპალიტეტში რძის გადამამუშავებელი საწარმო გაიხსნა

ასპინძის მუნიციპალიტეტის სოფელ ტოლოშში კომპანიამ „ახალი მესხეთი“ რძის გადამამუშავებელი საწარმოს მშენებლობა 2014 წელს დაიწყო. საწარმო სოფლის მეურნეობის სამინისტროს "შეღავათიანი აგროკრედიტის პროექტის" ფარგლებში აშენდა. დამფუძნებელმა ემზარ მელიქიძემ სახელმწიფოსგან იაფი სესხის სახით 60 ათასი დოლარის დაფინანსება მიიღო.

როგორც რძის გადამამუშავებელ საწარმოში ამბობენ, წარმადობა დღეში 4 ტონა რძეს შეადგენს. ადგილზე ფუნქციონირებს თანამედროვე ტექნოლოგიებით აღჭურვილი ლაბორატორია, რომელიც რძის და რძის პროდუქტების ხარისხის აკონტროლებს.

ამ ეტაპზე, შპს „ახალი მესხეთის“ რძის გადამამუშავებელი საწარმო რამდენიმე სახის რძის პროდუქტს - ე.წ ქარხნულ ყველს, სულგუნს, ე.წ იმერულ ყველს და ნადუღს აწარმოებს. დღეისათვის აქ 12 ადგილობრივი მოსახლეა დასაქმებული.

ახალი საწარმო ნედლეულით მიმდებარე სოფლების მოსახლეობიდან და საწარმოს ფარგლებში არსებული მცირე მეცხოველეობის ფერმიდან მარაგდება.

რძის გადამამუშავებელი საწარმოს გახსნას სამცხე-ჯავახეთის გუბერნატორი აკაკი მაჭუტაძე, ასპინძის მუნიციპალიტეტის გამგებელი ლევან ცაბაძე, სამხარეო ადმინისტრაციის, ასპინძის, ქალაქ ახალციხისა და ახალციხის მუნიციპალიტეტების და სოფლის მეურნეობის სამინისტროს რეგიონული სამმართველოს წარმომადგენლები დაესწრნენ.

[თამარ თოთაძე, ახალციხე]