ახალქალაქში რძის გადამამუშავებელი საწარმო აშენდება

საქართველოს მთავრობის გადაწყვეტილებით, მაღალმთიანი დასახლებების განვითარების ფონდისთვის გამოყოფილი თანხიდან რძის გადამამუშავებელი საწარმო ახალქალაქსა და დმანისში აშენდება.

სამინისტროს ინფორმაციით, ფონდისათვის გამოყოფილი 20 მილიონი ლარიდან 10 მილიონი მოხმარდება მაღალმთიან რეგიონებში სხვადასხვა ინფრასტრუქტურულ სამუშაოებს, მეორე 10 მილიონი კი სოფლის მეურნეობის განვითარების პროექტებს.

2019 წელს, საქართველოს მთავრობამ დაამტკიცა მთის განვითარების ეროვნული საბჭოს მიერ შემუშავებული „საქართველოს მაღალმთიანი დასახლებების განვითარების ხუთწლიანი სტრატეგია. სტრატეგიის მიზანია მაღალმთიანი დასახლებების მდგრადი განვითარება, იქ მცხოვრებთა სოციალური მხარდაჭერა და სერვისების ხელმისაწვდომობის გაზრდა.

საქართველოში მთის სტატუსი მინიჭებული აქვს ქვეყნის 1 731 დასახლებას და მთაში მუდმივად მცხოვრების სტატუსით სარგებლობს 246 012 მოქალაქე.

[sknews.ge]