პროგრამას 'აწარმოე საქართველოში' ახალი კომპონენტი ემატება

ინფრასტრუქტურის წახალისების სქემა დღეს, 13 ივნისს, ეკონომიკური საბჭოს სხდომაზე განიხილეს, რომელიც პრემიერ–მინისტრ ირაკლი ღარიბაშვილის ხელმძღვანელობით გაიმართა.

მეწარმე, რომელსაც სურს რეგიონში ააშენოს ახალი სასტუმრო, ან გააფართოოს უკვე არსებული, ბანკში სესხის დამტკიცების შემთხვევაში, ისარგებლებს სახელმწიფო თანადაფინანსების სქემითა და გირაოს უზრუნველყოფაში თანამონაწილეობით. პროგრამა აგვისტოდან ამოქმედდება.

„პროგრამაში მონაწილეობა შეეძლება ნებისმიერ მეწარმეს, რომელიც, გარდა თბილისის და ბათუმისა, საქართველოს რეგიონებში ააშენებს ახალ სასტუმროს ან გააფართოებს არსებულს. პროგრამა მოიცავს სამ კომპონენტს: სესხის პროცენტის თანადაფინასება და გირაოს უზრუნველყოფაში თანამონაწილეობა; ასევე, თუ მეწარმე გადაწყვეტს, რომ საერთაშორისო ოპერატორი შემოიყვანოს საქართველოში, ჩვენ მზად ვართ პირველი 2 წელი ბრენდის ოპერირების ხარჯის თანამონაწილეობაში შევიდეთ, რაც ხარისხისა და სტანდარტებს უზრუნველყოფს. მესამე კომპონენტი კი ითვალისწინებს ტექნიკურ დახმარებას–პროგრამები, ტრენინგები, კვალიფიკაციის ამაღლება, მარკეტინკის გაუმჯობესება,“ – განაცხადა ეკონომიკის მინისტრის მოადგილემ ქეთევან ბოჭორიშვილმა.

ეკონომიკურმა საბჭომ თხილის წარმოების განვითარების ხელშეწყობის გეგმებზეც იმსჯელა. საბჭოს გადაწყვეტილებით, სოფელ დარჩელში აშენდება თხილის საშრობი და სასაწყობე ინფრასტრუქტურა.

„თხილის წარმოების განვითარების ხელშეწყობის პროგრამა ითვალისწინებს ინფრასტრუქტურის შექმნას, განსაკუთრებით დასავლეთ საქართველოში. შეირჩა რამდენიმე რეგიონი, სადაც შეიძლება ამ დარგის განვითარება. დარგი არის ძალიან მნიშვნელოვანი, ვინაიდან სერიოზული საექსპორტო პოტენციალის მატარებელია. ვგეგმავს ამ ეტაპზე დარჩელში ავაშენოთ თხილის საშრობი და სასაწყობე ინფრასტრუქტურა, რომელიც გააერთიანებს მინიმუმ 500 ოჯახს. ეს იქნება პირველი საპილოტე პროგრამა“, – აღნიშნა სოფლის მეურნეობის მინისტრმა ოთარ დანელიამ სხდომის დასრულების შემდეგ.

ეკონომიკური საბჭოს წევრებმა ასევე განიხილეს რკინიგზის მოდერნიზაციის განახლებული პროექტი, რომელიც ეხება ზესტაფონი–ხაშურის მონაკვეთზე გამტარუნარიანობის ზრდას. საქართველოს რკინიგზის გენერალური დირექტორის, მამუკა ბახტაძის განმარტებით, ახალი პროექტი ხელს შეუწყობს ქვეყნის სატრანსპორტო პოტენციალის ამაღლებას.

[sknews.ge]