ფერმერს სტიქიამ კარტოფილის ნათესების 40 პროცენტი გაუნადგურა

3 ივნისს ადიგენის მუნიციპალიტეტში სტიქიამ ორი სოფელი უდე და აბასთუმანი დააზარალა. სოფელ უდეში მცხოვრებ ფერმერს, პავლე გიქოშვილს რამდენიმე ჯიშის კარტოფილი სამ ჰექტარ მიწის ფართობზე აქვს დათესილი.

„შუადღეს, დაახლოებით ოთხი საათი იყო სეტყვა მოვიდა, სეტყვამ მშვიდობიანად ჩაიარა, მნიშვნელოვნად არაფერი დაუზიანებია, საღამოს ქარიშხალი იყო, მოყვა დიდი წვიმა და ნაკვეთი ჩახრამა, ღარები გააჩინა და კარტოფილებიც წაიღო. ერთი თვალის გადავლებით შეიძლება ითქვას, რომ 40–50 პროცენტი გააფუჭა. ნაკვეთში 2,50 ლარიანი კარტოფილის რამდენიმე ჯიში მაქვს შეტანილი“, – ამბობს პავლე გიქოშვილი და ამატებს, რომ გარდა კარტოფილის ნათესებისა, სიმინდის ნაკვეთის დაახლოებით 20–30 პროცენტიც დაუზიანდა.

რა თანხის ზარალი მიიღო პავლე გიქოშვილმა, თავად ამის თქმა უჭირს. თუმცა ამბობს, რომ ჰექტარზე საშუალოდ 40 ტონა კარტოფილი მოჰყავს.

„სამი ჰექტრიდან ერთიც რომ დაზიანებულიყო, ჩათვალეთ, რომ 40 ტონა კარტოფილი გაფუჭდა. 40 ტონა კარტოფილი საშუალოდ 70 თეთრად რომ გაყიდო 28–30 ათასი ლარი გამოდის“, – ამბობს გიქოშვილი.

ადიგენის სოფლის მეურნეობის საინფორმაციო–საკონსულტაციო სამსახურში განმარტავენ, რომ სტიქიის შედეგად დაზარალებული სოფლები ადგილზე მოინახულეს.

„მუნიციპალიტეტის კომპეტენციაა, რომ გამოყოს კომისია, მაგრამ გამორიცხული არაა მუნიციპალიტეტმა საჭიროდ არ მიიჩნიოს კომისიის შექმნა, რადგან სოფლის მეურნეობის კუთხით მნიშვნელოვან ზიანს ადგილი არ აქვს“, – ამბობს საინფორმაციო–საკონსულტაციო სამსახურის უფროსი თამაზ ქველაძე.

ადიგენის მუნიციპალიტეტის გამგეობაში კი განმარტავენ, რომ ზარალის შემსწავლელი კომისია ორი დღეა მუშაობს, რომელიც სოფლის მეურნეობისა და ინფრასტრუქტურის კუთხით მიყენებულ ზარალს სწავლობს.





[თამარ თოთაძე, ადიგენი]