ადიგენის საკრებულომ ოპოზიციას ფრაქციის შექმნაზე უარი უთხრა

„გაერთიანებული დემოკრატიული მოძრაობის“ ორმა წევრმა: მალხაზ ბოჩიკაშვილმა და მარლენ ქაფიანიძემ და „მრეწველების“ ერთმა წევრმა: ლევან გოგნაძემ, ადიგენის საკრებულოში ახალი ფრაქციის შექმნა გადაწვიტეს.

„თავიდან დავრეგისტრირდით როგორც „ნინო ბურჯანაძე–ერთიანი ოპოზიცია“, მაგრამ მერე სახელი გადავარქვით და „ადიგენი – გარემოს დაცვა“ დავარქვით“, – ამბობს „გაერთიანებული დემოკრატიული მოძრაობის“ ადიგენის შტაბის უფროსი მალხაზ ბოჩიკაშვილი და ამატებს, რომ 1 ივნისს ფრაქცია შექმნეს და 4 ივნისს საკრებულოს მის დასარეგისტრირებლად შესაბამისი დოკუმენტაცია წარუდგინეს.

ადიგენის მუნიციპალიტეტის საკრებულოში იურიდიულ საკითხთა კომისიის სხდომა დღეს, 11 ივნისს გაიმართა. ინიციატორებს ფრაქციის შექმნაზე უარი უთხრეს.

ადიგენის მუნიციპალიტეტის საკრებულოს იურიდიულ საკითხთა კომისიის თავმჯდომარის მუხრან ხარჩილაძის თქმით, მათ ფრაქციის შექმნაზე უარი თვითმმართველობის კოდექსის 30–ე მუხლისა და საკრებულოს რეგლამენტის 35 მუხლის პირველი და მეორე ქვეპუნქტების თანახმად ეთქვათ.

„საკრებულოს რეგლამენტის 35–ე მუხლის პირველი ქვეპუნქტის მიხედვით, საკრებულოს პარტია წარმოადგენს საერთო პოლიტიკური შეხედულებების მქონე საკრებულოს წევრთა ნებაყოფლობით გაერთიანებას, რომელიც იქნება საკრებულოში მათი გაერთიანების მიზეზი. ფრაქცია იქმნება მინიმუმ სამი პიროვნებისგან, აქ ორი ბურჯანაძის პარტიიდან, ერთი კი მრეწველებიდანაა, ერთი პოლიტიკური შეხედულების არ არიან. შესაბამისად, ფრაქციის შექმნის უფლება არ აქვთ“, – ამბობს მუხრან ხარჩილაძე.

მალხაზ ბოჩიკაშვილი ამბობს, რომ მართალია სხვადასხვა პარტიას წარმოადგენენ, მაგრამ ერთი პოზიციის ირგვლივ გაერთიანდნენ, რაც დაბრკოლების მიზეზი არ უნდა გამხდარიყო.

„ჩვენ შეიძლება პოლიტიკურად სხვადასხვა შეხედულებები გვაქვს, მაგრამ ადიგენის სამოქმედო ტერიტორიაზე ორივე პარტიის წარმომადგენელი შევჯერდით ერთ პოზიციაზე“, – ამბობს ბოჩკაშვილი და ამატებს, რომ სინამდვილეში აღნიშნული კომისია დამოუკიდებლად ვერ წყვეტს როგორ მოიქცეს, თუ სამცხე–ჯავახეთის გუბერნიიდან არ იხელმძღვანელა.

სამცხე–ჯავახეთის სამხარეო ადმინისტრაციაში აღნიშნულს კატეგორიულად უარყოფენ და ამბობენ, რომ ადიგენის საკრებულო კანონის შესაბამისად ხელმძღვანელობს.

მუხრან ხარჩილაძე ირწმუნება, რომ ჯერ ფრაქციის საკითხი საბოლოოდ გადაწყვეტილი არ არის. ამ საკითხმა კიდევ ორი ინსტანცია უნდა გაიაროს: „ჯერ ბიუროს სხდომაზე უნდა გავიდეს და შემდეგ საკრებულოს სხდომაზე უნდა განიხილონ“.

[თამარ თოთაძე, ახალციხე]