ახალციხეს წყალმომარაგება ხვალ დილით აღუდგება

„საქართველოს გაერთიანებული წყალმომარაგების კომპანიის“ სამცხე–ჯავახეთის სერვისცენტრში განარტავენ, რომ შეფერხების მიზეზი ურავლის სათავე ნაგებობაზე მიმდინარე სამუშაოებია.

სერვისცენტრის მენეჯერის გიორგი ბაგინაშვილის განმარტებით, ურავლის სათავე ნაგებობაზე ახალი საქლორატორო შენობა და მიკროჰესი აშენდა და დღეს ამუშავდა, წყალიც ამიტომ შეწყდა.

„დღის განმავლობაში ყველა უბანს ცოტ–ცოტა მივაწოდეთ, რომ მთლად უწყლოდ არ დარჩენილიყვნენ, საღამოს ყველგან შეწყდა. უკვე დასრულდა სამუშაოები და წამოვიდა ქსელში წყალი, მაგრამ რამდენიმე საათია საჭირო, რომ მოვიდეს ქალაქში. ხვალ დილით წყალი ჩვეულებისამებრ ექნება ყველა უბანს“, – ამბობს ბაგინაშვილი და ამატებს, რომ აბონენტების წუხილის ესმის, მასთანაც ასობით მომხმარებელი რეკავს.

„მესმის მოსახლეობის, თუმცა, კარგი საქმე გაკეთდა ნამდვილად, გაუმჯობესდება წყლის ხარისხი. ხვალ დილით ნამდვილად ყველას ექნება“, – ირწმუნებიან წყალმომარაგების კომპანიაში.

[ნინო ნარიმანიშვილი, ახალციხე]