დაბა ასპინძას წყალს ისევ წყალმზიდებით აწვდიან

„საქართველოს გაერთიანებული წყალმომარაგების კომპანიის“ სამცხე–ჯავახეთის რეგიონული ფილიალის მენეჯერის ბორის სპანდერაშვილის თქმით, ასპინძაში ისევ სათავე ნაგებობაზე ფილტერბის გაწმენდის პროცესი მიმდინარეობს.

სპანდერაშვილი ამბობს, რომ ოთისწყლების სათავე ნაგებობიდან დაბის ნაწილისთვის წყალი გუშინ, 14 მაისს, საღამოს გაუშვეს, თუმცა, ისევ გადაკეტეს: „გუშინ კი გავუშვით მაგრამ, წვიმის გამო აიმღვრა და ბინძური წყალი წამოვიდა“.

როდის დასრულდება ოთისწყლების სათავე ნაგებობის გაწმენდა, წყალმომარაგების კომპანიაში ამაზე ვერ საუბრობენ. ამბობენ, რომ ეს კლიმატურ პირობებზეა დამოკიდებული.

შეგახსენებთ, დაბა ასპინძაში სასმელი წყლის მიწოდება 10 მაისს შეწყდა. ადგილობრივების ნაწილი სასმელ წყალს ყიდულობს, ნაწილი კი ახლომდებარე სოფლებიდან ეზიდება. კომპანიაში ამბობენ, რომ ადგილობრივების წყლით მომარაგებას იქამდე გააგრძელებენ, ვიდრე სასმელი წყლის მიწოდება არ აღდგება.

[ლუბა გიორგაძე, ასპინძა]