ახალციხეში ეთნიკური უმცირესობების ფორუმი გაიმართება

ფორუმში მონაწილეობას მიიღებენ რეგიონის მუნიციპალიტეტების საგანმანათლებლო სფეროს, თვითმმართველობისა და ადგილობრივი არასამთავრობო ორგანიზაციების წარმომადგენლები.

ფორუმის პირდაპირი დიალოგის თემა იქნება: „საქართველო-ევროკავშირის ურთიერთობები, ამჟამინდელი კავშირები და პერსპექტივები“, „საქართველო და აღმოსავლეთ პარტნიორობის სისტემა“.

„განსახილველ საკითხებზე, ადგილობრივი მოქალაქეები მიიღებენ უახლესს ცნობებს და მათ შესაძლებლობა ექნებათ, უშუალო კითხვები დაუსვან სამინისტროების წარმომადგენლებს, რომლებიც ფორუმს დაესწრებიან“, – აცხადებენ ორგანიზატორები.

ფორუმის შემდგომ, მომზადებული სპეციალური ანგარიში გადაეცემა რეგიონის საგანმანათლებლო დაწასებეულების ბიბლიოთეკებს, დემოკრატიული ჩართულობის ცენტრებს, თვითმმართველობებს.

ფორუმი „ეთნოსთა შორის თანამშრომლობისა და კონსულტაციების ანალიტიკური ცენტრის - ACICC”-ის 2015 წლის მცირე გრანტების აღმოსავლეთ პარტნიორობის უმცირესობათა ქსელის პროგრამის ფარგლებში ეწყობა. მსგავსი შეხვედრები ახალციხისა და მარნეულის მუნიციპალიტეტებში შედგება.

"ახალგაზრდა ადვოკატების“ განცხადებით, პროექტის მთავრი მიზანია, საქართველოში მცხოვრები ეთნიკური უმცირესობის ინფორმირება, ჩართულობა და ნდობის გაზრდა ისეთ საკითხებთან დაკავშირებით, როგორიცაა აღმოსავლეთ პარტნიორობის პროგრამა, საქართველოსა და ევროკავშირის თანამშრომლობის პერსპექტივები; აღმოსავლეთ პარტნიორობის პოლიტიკის ფარგლებში უმცირესობათა უფლებების როლი.

[ნინო ნარიმანიშვილი, ახალციხე]