ახალციხეში საქართველოს ეროვნული სამოქმედო გეგმის განხილვა გაიმართება

შეხვედრას ადგილობრივი თვითმმართველობების და არასამთავრობო ორგანიზაციების წარმომადგენლები, ასევე სხვა დაინტერესებული პირები დაესწრებიან.

საქართველო საერთაშორისო ინიციატივის - ღია მმართველობის პარტნიორობის წევრია 2011 წლიდან, ხოლო 2014 წელს ორი წლის ვადით არჩეული იქნა ღია მმართველობის პარტნიორობის მმართველი კომიტეტის წევრად. როგორც ამ ინიციატივის წევრი ქვეყანა, მთავრობა შეიმუშავებს ორწლიან სამოქმედო გეგმას, რომელსაც ღია მმართველობის პარტნიორობას 2016 წლის ივლისში წარუდგენს. პარტნიორობის ფუნდამენტური ღირებულებებია ღიაობა, გამჭვირვალობა და გადაწყვეტილების მიღების პროცესში მოქალაქეთა ჩართულობა.

შესაბამისად, საქართველოს მთავრობა სამოქმედო გეგმის შემუშავებას სამოქალაქო და ფართო საზოგადოებასთან მჭიდრო კონსულტაციების მეშვეობით და მათი აქტიური მონაწილოებით ახორციელებს.

საჯარო კონსულტაციები სამოქმედო გეგმის შემუშავების პროცესში ჩართული საჯარო დაწესებულებებისა და არასამთავრობო ორგანიზაციების წარმომადგენელთა მონაწილეობით გაიმართება.

კონსულტაციები საქართველოს მასშტაბით 29 მარტს დაიწყო და 27 მაისამდე გაგრძელდება.

შეხვედრები ორგანიზებულია საქართველოს იუსტიციის სამინისტროს ანალიტიკური დეპარტამენტის და ახალციხის დემოკრატიული ჩართულობის ცენტრის მიერ.

საქართველოს იუსტიციის სამინისტროს ანალიტიკური დეპარტამენტი ღია მმართველობა საქართველოს სამდივნოს წარმოადგენს. კონსულტაციები მიზნად ისახავს საზოგადოებას მიაწოდოს ინფორმაცია მომდევნო ორი წლის მანძილზე მთავრობის მიერ დაგეგმილი იმ ღონისძიებების შესახებ, რაც ღია და მონაწილეობითი მმართველობის უზრუნველყოფას ემსახურება.

გარდა ამისა, შეხვედრის მიზანია საზოგადოების ჩართულობის გაზრდა, მათი მოსაზრებების, იდეების შეკრება, რათა მთავრობის სამოქმედო გეგმა და გაწერილი ღონისძიებები პასუხობდეს და შეესაბამებოდეს მოქალაქეთა საჭიროებებს. შეხვედრები ღია მმართველობა საქართველოს ფორუმის ფარგლებში იგეგმება.

საჯარო კონსულტაციების ფარგლებში იუსტიციის სამინისტრო არასამთავრობო სექტორთან და ღია მმართველობის ფორუმის წევრ სხვა უწყებებთან ერთად შეხვედრებს გამართავს ადგილობრივ მოსახლეობასთან, სტუდენტებთან და აკადემიურ წრესთან, ასევე ადგილობრივი თვითმმართველობის ორგანოებთან.

[sknews.ge]