აგარის საბავშვო ბაღს არცერთი თანამშრომელი არ დატოვებს

ამის შესახებ აგარის საბავშვო ბაღის თანამშრომლებს თვითმმართველი თემის ახალციხის მუნიციპალიტეტის სკოლამდელი აღზრდის დაწესებულებათა გაერთიანების ხელმძღვანელმა ლელა ოქრომელიძემ რამდენიმე წუთის წინ განუცხადა. იგი თანამშრომლებს აგარის საბავშვო ბაღში შეხვდა.

„გვითხრა, რომ ყველა ვრჩებით სამსახურში და მუშაობას ჩვეულებრივ ვაგრძელებთ, არცერთი არ გაგვიშვეს სამსახურიდან“, - ამბობს აგარის საბავშვო ბაღის აღმზრდელი ნანა ჩინჩალაძე.

აღნიშნულს ადასტურებს „სამხრეთის კარიბჭესთან“ სატელეფონო საუბარში ლელა ოქრომელიძეც: „ყველას ჩვეულებრივ გაუგრძელდება ხელშეკრულება. თუმცა ჯერ ახალი თანამშრომლების დამატება ვერ მოხერხდება, რადგან არაა იმდენი ბავშვი ბაღში, რომ ახალი, მესამე ჯგუფი დავამატოთ“.

მისივე თქმით, თვითმმართველი თემის ახალციხის მუნიციპალიტეტის სკოლამდელი აღზრდის დაწესებულებათა გაერთიანებაში დასაქმების მსურველის 10 განცხადებაა შესული: „თუ ახალი ჯგუფი დაემატება, მაშინ სამ ახალ თანამშრომელს დავამატებთ“.

ხვალ, 1 ოქტომბერს, 9:00 საათზე აგარის საბავშვო ბაღში სასწავლო პროცესი ჩვეულებრივ განახლდება.

შეგახსენებთ, დილიდან აგარის ბაღში დაძაბულობა იყო. თანამშრომლები კოლეგების გათავისუფლებას და მათ ადგილზე ახალი პედაგოგების დანიშვნას აპროტესტებდნენ. ძველი და ახალი თანამშრომლები ერთმანეთს სიტყვიერადაც დაუპირისპირდნენ. დღის მეორე ნახევარში, თანამშრომლები სკოლამდელი აღზრდის დაწესებულებათა გაერთიანების ხელმძღვანელთან, ლელა ოქრომელიძესთან შესახვედრად ახალციხეში ჩამოვიდნენ. შეხვედრა გამგებლის კაბინეტში, დახურულ კარს მიღმა შედგა, თუმცა, მაშინ თანამშრომლებმა კითხვებზე პასუხები ვერ მიიღეს.

[თამუნა უჩიძე, ახალციხე]