ახალციხის მეხუთე საბავშვო ბაღის მენეჯერმა სამსახური დატოვა

ნინო ბაღდოშვილის პირადი განცხადება სამსახურიდან გათავისუფლების შესახებ ახალციხის სკოლამდელი აღზრდის დაწესებულებათა გაერთიანებაში ხუთ იანვარს დააკმაყოფილეს.

„განცხადება გათავისუფლების შესახებ ნამდვილად ჩემი ნებით დავწერე, მაგრამ ჩემი სურვილით არ დამიწერია“, - ამბობს ბაღდოშვილი.

„ბაღში არსებობს გარკვეული ბარიერები და არ მინდა ეს ბაღი ჩემს გამო მიზანში იყოს ამოღებული. ბაღის თანამშრომლებს მშვიდი მუშაობის საშუალება უნდა მიეცეთ“, – წერს ბაღდოშვილი განცხადებაში.

კითხვაზე, რა იგულისხმება მიზანში ამოღებაში, გვპასუხობს: „იყო რაღაც, რაც თვალით არ ჩანს. მაგრამ იმის გამო, რომ მე ოლეგ სანდროშვილის ცოლი ვარ, პრობლემა სულ იქნება“.

ბაღდოშვილმა სამსახურიდან წასვლის შესახებ განცხადება 2 დეკემბერს დაწერა. მას შემდეგ, რაც ქალაქის მერს ბაღში შეტანილ პურში აღმოჩენილი თაგვის კვალი აჩვენა.

„ახლა ბაღში უფროსის მოვალეობას მასწავლებელი ნანა ბარბლიშვილი ასრულებს. ძალიან კარგი მასწავლებელია და ვფიქრობ, რომ ამ შემთხვევაში სწორი არჩევანი გააკეთეს“, - ამბობს ბაღდოშვილი.

ახალციხის სკოლამდელი აღზრდის დაწესებულებათა გაერთიანებაში აცხადებენ, რომ რამდენიმე განცხადება მეხუთე საბავშვო ბაღის მენეჯერის პოზიციაზე უკვე შესულია და არჩევანს მათ შორის საუკეთესოზე გააკეთებენ. რაც შეეხება ბაღდოშვილის განცხადებას იმის შესახებ, რომ მას ვინმე პრობლემებს იმის გამო უქმნიდა, რომ სანდროშვილის ცოლია, გაერთიანებაში აბსურდულს უწოდებენ: „პირადი განცხადება დაუკმაყოფილეს და ის, რომ სანდროშვილის ცოლია, ნამდვილად არაფერ შუაშია“.

[თამუნა უჩიძე, ახალციხე]