ახალციხის ერთ–ერთ საბავშო ბაღში პურში თაგვის ცურცლი იპოვეს

ეს ფაქტი ახალციხის მერიისთვის და სკოლამდელი აღზრდის დაწესებულებათა გაერთიანების ხელმძღვანელისთვის ცნობილი დღეს გახდა. შეხვედრაზე 2015 წლის ადგილობრივი ბიუჯეტის პროექტს განიხილავდნენ, რომელსაც ბაღის მენეჯერები და შშმ პირები ესწრებოდნენ. ახალციხის მეხუთე საბავშვო ბაღის მენეჯერმა ნინო ბაღდოშვილმა სურსათის ხარისხზე ისაუბრა და აღნიშნა, რომ მისი ბაღი საჭმელად უვარგისი პურით მოამარაგეს.

ნინო ბაღდოშვილმა შეხვედრაზე პურის ნაჭერიც მიიტანა, სადაც მისივე თქმით, თაგვის ცურცლი აღმოაჩინეს. ბაღდოშვილმა „სამხრეთის კარიბჭესთან“ კომენტარის გაკეთებისგან თავი შეიკავა. ააიპ ახალციხის სკოლამდელი აღზრდის დაწესებულებათა გაერთიანების დირექტორმა ნანა ბერიძემ კი განაცხადა, რომ აქამდე მსგავსი შემთხვევა არ ყოფილა და ამ ფაქტს შესაბამისი რეაგირება აუცილებლად მოჰყვება.

„ბაღები ერთ–ერთი ადგილობრივი პურის საცხობიდან მარაგდება, ტენდერი მოგებული აქვს გორის კომპანიას და მისი ქვეკონტრაქტორი გვამარაგებს. პირველ რიგში დავიბარებთ და პასუხს მოვთხოვთ თუ რატომ მოხდა ეს. ამას მოჰყვება სურსათის უვნებლობის სამსახურის ჩარევაც და აუცილებლად შემოწმდება პროდუქტის ხარისხი“, – ამბობს ნანა ბერიძე და ამატებს, რომ დაწესებულებას სურსათის ეროვნულ სააგენტოსთვის იმ ობიექტების ჩამონათვალი გადაცემული აქვს, რომლებიც საბავშვო ბაღებს ამარაგებენ.

[თამარ თოთაძე, ახალციხე]