მოსწავლეების მშობლები დირექტორის მიერ სკოლაში გოგონების შემოწმების ფაქტს აპროტესტებენ და კომპეტენტურ უწყებებს რეაგირებას სთხოვენ.
საუბარია მეორე სკოლაში 19 სექტემბერს
მომხდარ ფაქტზე. შეგახსენებთ, რომ მას შემდეგ, რაც გაირკვა, რომ სკოლის საკანალიზაციო სისტემის გაჭედვის მიზეზი ჰიგიენური საფენი გახდა, დირექტორმა გოგონები შეკრიბა და მათ ქვედა საცვლები შეუმოწმა.
დირექტორის წინააღმდეგ სკოლაში დღეს საპროტესტო აქცია უნდა გამართულიყო, თუმცა, ბოლო წუთებში სკოლაში მისვლა ყველა მშობელმა ვერ გაბედა. სკოლაში მხოლოდ ხუთი მშობელი მივიდა. აქცია აღარ გამართულა, თუმცა მათ ახალქალაქის საგანმანათლებლო რესურსცენტრს მიმართეს და რეაგირება მოითხოვეს.
შეკრებილები ამბობენ, რომ დანარჩენმა მშობლებმა აქციაში მონაწილეობაზე უარი იმ მოტივით განაცხადეს, რომ ეს შედეგს არ გამოიღებდა. მშობლები ფიქრობენ, რომ არც დირექტორს დასჯიდნენ და არც მასწავლებლებს, მათ შვილებს კი სკოლაში პრობლემები შეექმნებოდათ.
გოგონების მშობლებმა განათლების სამინისტროს ინსპექტორს მაია მაცუკატოვასაც მიმართეს.
„რატომ არც ერთმა მშობელმა არ მოგვმართა, მაშინ, როცა ეს მოხდა? რატომ გავიგეთ სხვებისგან? ჩვენ ზუსტად არ ვიცოდით რა მოხდა, საიდან უნდა გვცოდნოდა რეალური სიტუაციის შესახებ? ზოგმა მშობელმა მაშინვე სამინისტროს მიმართა“, - აცხადებს მაია მაცუკატოვა.
რესურსცენტრის გარდა მშობლებმა საჩივარი საქართველოს სახალხო დამცველის ახალქალაქის ოფისშიც შეიტანეს.
იმ დროის განმავლობაში, ვიდრე მშობლები უწყებებში საჩივრებს ტოვებდნენ, მათ ტელეფონით უკავშირდებოდნენ და სთხოვდნენ განცხადებები უკან გამოეტანათ. ასევე სთხოვდნენ, მომხდარზე არ ესაუბრათ მედიასთან.
მშობლებისა და მათი შვილების უსაფრთხოებიდან გამომდინარე, ”სამხრეთის კარიბჭე” რესპონდენტების ვინაობას არ ამხელს.
„ჩემს შვილს სკოლაში არ ვუშვებ. სხვა ბავშვები კი დადიან სკოლაში, რატომ მოხდა ასე?! მშობლებს ეშინიათ. კლასის ხელმძღვანელებმა გააფრთხილეს ბავშვები, რომ არსად არაფერი მოეყოლათ“, - ამბობს ერთ-ერთი მშობელი.
შვილს სკოლაში არ უშვებს მეორე მშობელიც. იგი ამბობს, რომ გოგონას მომხდარის გამო ქუჩაში გამოსვლის რცხვენია.
„ბავშვი მთხოვს, რომ ქართულ სკოლაში გადავიყვანო, მაგრამ მე-9 კლასშია, ახლა რომ გადავიყვანო, როგორ ისწავლის?! გოგონა იმდენად ნაწყენია, მეუბნება, დედა, თუ სხვა მშობლები მის ცემას დაიწყებენ, შენც დაარტყიო. ბავშვებს ფსიქოლოგი ჭირდებათ. სხვა ქალაქში გვინდოდა წასვლა, მაგრამ ჩემს გოგონას ეშინია, ამბობს, რომ მას იქაც იცნობენ, შეიძლება გაიგონ, აქ რა მოხდა“, - ამბობს იგი.
მეორე კვირაა არცერთ შვილს არ უშვებს სკოლაში მესამე მშობელიც: ”არცერთ მშობელს სკოლაში მოსვლა არ უნდა, მიზეზს ყველა პოულობს. ჩემი ორივე გოგონა სახლშია. ყველა რატომ არ შეამოწმეს და რატომ უთხრეს, შენ წესიერი ოჯახიდან ხარ. ვინ არის ასეთი, რომ ასე ილაპარაკოს?! გარდა ამისა, ავრცელებენ, თითქოს ამას სპეციალურად ოპოზიცია აკეთებს. მე არავის ვუჭერ მხარს, რა შუაშია აქ პოზიცია ან ოპოზიცია?!. და კიდევ, საპირფარეშოში ნაგვის ურნა არ დგას, ყველაფრისთვის არის ფული და ამისთვისაც გამოენახათ“.
მშობლები სამინისტროს რეაგირებას ელოდებიან და ამბობენ, რომ გაჩერებას არ აპირებენ.
[sknews.ge]