„დაგვიბრუნეთ ჩვენი დირექტორი“ - საპროტესტო აქცია ახალქალაქში

რესურსცენტრის შენობასთან 20-მდე ადამიანი, ძირითადად დაწყებითი კლასების მოსწავლეთა მშობლები, დილის 9:00 საათზე შეიკრიბნენ. მოგვიანებით მათ სხვებიც შეუერთდნენ. მათ შორის 9 გოგონა, რომელთა თქმით, აქციაზე გამოსვლა სკოლის სხვა მოსწავლეებსაც უნდოდათ, მაგრამ მასწავლებლებმა ნება არ დართეს.

შეგახსენებთ, რომ 25 სექტემბერს, საკუთარი განცხადების საფუძველზე, ახალქალაქის მეორე საჯარო სკოლის დირექტორმა კარინე ნახატაკიანმა თანამდებობა დატოვა. ეს გადაწუვეტილება კი მას შემდეგ მიიღო, რაც მშობელთა ნაწილმა სკოლაში ჩატარებული გოგონების შემოწმება გააპროტესტა.

„დაგვიბრუნეთ ჩვენი დირექტორი“, - ამ მოწოდებით მშობლები და მოსწავლეები სკოლაში დირექტორის დაბრუნებას ითხოვენ.

„გვინდა, რომ ჩვენი დირექტორი ქალბატონი კარინე იყოს, რადგან მის გარეშე ჩვენი სკოლა, სხვა სკოლების მსგავსად, უწესრიგობის ბუდედ იქცევა“, – ამბობს ერთ–ერთი მოსწავლე გოგონა.

მიუხედავად იმისა, რომ 19 სექტემბრის შემდეგ განაწყენებული გოგონების ნაწილი სკოლაში აღარ დადიდა, ახლა ამბობენ, რომ შემოწმებას არავინ გაუნაწყენებია.

„გოგონები ერთმანეთს ვუყურებდით და ისე მივდიოდით, ვფიქრობდით, რატომ უნდა ეპარებოდეს ვინმეს ჩვენში ეჭვი. ჩვენ ყველამ გავიხსენით და შევიკარით ღილები, არავის უწყენინებია“, – ამბობს ერთ-ერთი გოგონა.

„ყველას ესმის, რომ სიმკაცრე წესრიგის წინაპირობაა. თუ სკოლაში წესრიგი არ იქნა, ის სკოლას აღარ ემსგავსება“, – განაცხადა აქციის ერთ–ერთმა მონაწილემ.

აქციის მიმდინარეობისას სკოლაში ახალქალაქის რესურსცენტრის დირექტორი, ახალქალაქის მუნიციპალიტეტის საკრებულოს თავმჯდომარე, გამგებელი, პარლამენტის დეპუტატები და მმართველი გუნდის მაჟორიტარი კანდიდატები მივიდნენ . მათ თან ჰქონდათ საქართველოს განათლებისა და მეცნიერების მინისტრის 25 სექტემბრის ბრძანება, რომლის მიხედვით, დირექტორის მოვალეობის დროებით შემსრულებლად სასწავლო ნაწილი ლარისა კაროიანი დაინიშნა.

საპროტესტო აქციაზე შეკრებილი მშობლები კი ისევ ყოფილი დირექტორის დაბრუნებას ითხოვდნენ.

”იმ მშობლებს, რომლებმაც საჩივარი შეიტანეს, შეეკრიბათ მშობელთა კრება, ეთქვათ, რომ ჩემი გოგონაც შენს გოგონასთან ერთად იყო, ეს ყველაფერი შენც შეგეხო, ეს ასე მოხდა. იქნებ არ მინდოდა, ეს ამბავი გახმაურებულიყო? შემდეგ ერევნიდან რომ არ დაერეკათ იმის გასარკვევად რა მოხდა ჩვენთან“, – განაცხადა თქვა ერთ–ერთმა მშობელმა.

შეკრებილთა თქმით, მშობლები, რომელთაც 19 სექტემბერს მომხდარის გამო საჩივარი დაწერეს, არასწორად მოიქცნენ.

გარკვეული დროის შემდეგ შეკრებილებთან რესურსცენტრის დირექტორი მივიდა და მოსწავლეებს გაკვეთილებზე დაბრუნება სთხოვა.

აქციაზე შეკრებილებმა რესურსცენტრში შეიტანეს განცხადება, რომელსაც 34–მა მშობელმა მოაწერა ხელი. განცხადებაში ვკითხულობთ, რომ მშობლები აღშფოთებულნი არიან და კარინე ნახატაკიანის სკოლაში დაბრუნებას ითხოვენ. „რატომ არ ჩაგვაყენეს საქმის კურსში და ჩვენ ნაცვლად მხოლოდ მშობელთა ერთმა ჯგუფმა გადაწყვიტა. ვისთვის იყო ეს მომგებიანი?“ – ვკითხულობთ განცხადებაში.

მშობელთა საჩივრის პასუხად, რესურსცენტრის უფროსმა ნარცის კარაპეტიანმა განაცხადა, რომ დირექტორი თანამდებობიდან გათავისუფლებულია საკუთარი განცხადების საფუძველზე, მინისტრმა გადაწყვეტილება უკვე მიიღო და კანონს უკანდასახევი ძალა აღარ გააჩნია.

[sknews.ge]