ახალციხეში ეთნიკური უმცირესობის პრობლემებსა და უფლებებზე მსჯელობენ

ახალციხის მუნიციპალიტეტში მცხოვრები ეთნიკური უმცირესობის წარმომადგენლებს „პროფესიული და ინკლუზიური განათლების განვითარების ასოციაციის“ წარმომადგენლები მათი უფლებების შესახებ ინფორმაციას აწვდიან. ასევე, აცნობენ ქვეყანაში დაგეგმილი იმ ღონისძიებების შესახებ, რომელთა განხორციელების მიზანიც, სწორედ ეთნიკური უმცირესობების მდგომარეობის გაუმჯობესებაა.

„დღეს ეთნიკური უმცირესობების ინტეგრაცია ნამდვილად ვერ ხერხდება. ეს ადამიანები ქვეყნის სრულფასოვან მოქალაქეებად ვერ გრძნობენ თავს.

ამიტომ ჩვენი მიზანია, მათ საკუთარი უფლებების შესახებ მივაწოდოთ ინფორმაცია, რომ შემდეგ მოითხოვონ მისი დაცვა“, – ამბობს „პროფესიული და ინკლუზიური განათლების განვითარების ასოციაციის“ გენერალური დირექტორის მოადგილე თამარ ჩოგაძე.

აღნიშნული ორგანიზაციის წარმომადგენლები ასევე იღებენ ინფომაციას იმის შესახბე, თუ რა პრობლემები აქვთ დღეს ეთნიკურ უმცირესობებს.
„მათ მიერ მოწოდებულ ინფრომაციას ჩვენ ევროკავშირს მივაწვდით და ვეცდებით რომ მცირე წვლილი მაინც შევიტანოთ ეთნიკური უმცირესობების მდგომარეობის გაუმჯობესებაში“, – გვიხსნის ჩოგაძე.

ახალციხის მუნციპალიტეტის სოფელ ყულალისში მცოხვრები მარდუნ პეტროსიანის თქმით, დღეს მთავარი პრობლემა ეთნიკური სომხებისთვის ენის ბარიერია: „მათ სახელმწიფო უწყებებში განცხადების დაწერაც კი არ შეუძლიათ, აქედან გამომდინარე, რაიმე უფლების დაცვაზე ლაპარაკი ზედმეტია“.

მსგავსი ტიპის შეხვედრებს, „პროფესიული და ინკლუზიური განათლების განვითარების ასოციაცა“, ევროკავშირის დაფინანსებით, სხვა ეთნიკური უმცირესობებით დასახლებულ მუნიციპალიტეტებშიც გამართავს. ახალციხე ამ ჩამონათვალში პირველი აღმოჩნდა.

[თამუნა უჩიძე, ახალციხე]